Афғонистон Инсон ҳуқуқлари комиссиясининг ишончли манбалари “Толибон”нинг икки жангариси Ғур вилоятида ҳомиладор ёш аёлни отиб ўлдирганини маълум қилди. Бу ҳақда Etilaatroz хабар берди.
Комиссиянинг таъкидлашича, “Толибон” етакчилари ўз халқига нисбатан “шафқатсиз ва ғайриинсоний ёндашув” учун жавобгарликка тортилиши керак. Аёлнинг исми Зармина бўлиб, 27 апрелга ўтар кечаси Фирузкўҳ шаҳрининг “Садсия” маҳалласидаги уйида ўлдирилган.
Инсон ҳуқуқлари комиссияси Зармина икки “Толибон” томонидан ўлдирилгани, улардан бири Ғурдаги “Толибон” қўмондонларидан бирининг ўғли мулла Қуддус эканини айтди. Икки қуролланган жангари 25 ёшли аёлни зўрламоқчи бўлган, аёл уларга қаршилик кўрсатиб бақирган. Шундан кейин мулла Қуддус томонидан жабрланувчи отиб ташланган.
Комиссиянинг қўшимча қилишича, қуролланган “Толибон” аввал ҳам турли вазиятларда “қизлар ва ёш аёлларни мажбуран турмушга берган ёки жинсий алоқага ундаган”.
“Доимий равишда халқнинг ҳаёти ва руҳий хавфсизлигини таъминлаш зарурлигини таъкидлаган ‘Толибон’ етакчилари ва вакиллари афғон халқига, миллий ва халқаро инсон ҳуқуқлари тузилмалари олдида ғайриинсоний ёндашувлари юзасидан жавоб бериши керак”, — дейилади Инсон ҳуқуқлари бўйича комиссия ҳисоботида.
Комиссия Бирлашган Миллатлар Ташкилоти ва халқаро ҳамжамиятдан “Толибоннинг бундай ғайриинсоний хатти-ҳаракатлари”ни инсон ҳуқуқлари бузилиши ва айниқса, аёллар ҳуқуқлари бузилишининг яққол мисоллари сифатида ўрганиш ва таҳлил қилишни сўради.
Изоҳ (0)