Сирдарё ва Жиззах вилоятининг айрим ҳудудларида электр ва ичимлик суви таъминотида узилиш кузатилиши мумкин. Бу ҳақда Энергетика вазирлиги хабар берди.
Маълум қилинишича, соат 17:15 да Сирдарё иссиқлик электр станциясидаги юқори кучланишли электр қурилмада носозлик юзага келган. Бунинг натижасида Сардоба, Оқолтин, Мирзаобод, Янгиер ва Ховос туманларининг айрим ҳудудларида электр таъминотида узилишлар кузатилмоқда.
“Ўзсувтаъминот” юқорида санаб ўтилган ҳудудлардан ташқари Жиззах вилоятининг айрим ҳудудларида ҳам электр таъминоти билан биргаликда ичимлик сув таъминотида узилиш кузатилиши мумкинлигини хабар қилди.
Мавжуд етишмаётган қувватни Тошкент ва Навоий иссиқлик электр станциялари ва “Чорвоқ” гидроэлектр станциясининг захира қувватлари ҳисобидан таъминлаш чоралари кўрилмоқда.
Ҳозирда Сирдарё иссиқлик электр станциясининг махсус бригадалари томонидан мазкур носозликни бартараф этиш ишлари олиб борилмоқда. Носозлик қисқа вақт ичида бартараф этилиши ва ҳудудларнинг электр ва сув таъминоти қайта тикланиши таъкидланган.
“Келтирилган ноқулайликлар учун истеъмолчилардан узр сўраймиз”, — дейилади хабарда.
Энергетика вазирлиги Сирдарё вилояти истеъмолчиларининг электр таъминоти тўлиқ қайта тикланганини маълум қилди. Ҳозирда иссиқлик электр станцияси барқарор ишламоқда.
Изоҳ (0)