Андижон вилоятида ташкил этилган 928 та сайлов участкаларида янги таҳрирдаги Конституция бўйича референдумда ўз муносабатини билдиришда андижонликлар фаол иштирок этмоқда. Бу ҳақда “Дарё” мухбири Умиджон Мамарасулов хабар бермоқда.
Марҳамат туманида истиқомат қилувчи 98 ёшли Иминжон ота Темиров ёш умрининг саккиз йилини урушда ўтказган. У 113-махсус ўқчи бригада таркибида бўлинма командири вазифасида 1941—1942 йилларда Кубан ҳудудидаги жангларда иштирок этиб, сўнг Узоқ Шарқда Японияга қарши урушда Жанубий Сахалин ва Курил оролларидаги ҳарбий ҳаракатларда қатнашган.
Бугунги референдумда Иминжон ота ўзи яшаётган ҳудуддаги 563-референдум участкасига бориб, овоз берди.
“Маҳалладагилар тушликдан кейин уйга кўчма қути олиб келишади дейишди. Лекин уларнинг келишини истамадим. Шунинг учун шартта ҳассамни қўлга олиб, бу ёққа қараб келавердим. Эвараларимнинг келажаги учун овоз бердим”, — дейди Иминжон ота Темиров.
Иминжон ота каби тумандаги “Гар-Гар” маҳалласида яшаётган 94 ёшли Абдураҳмон ота Ҳожиалиев ҳамда Гулсорахон ая Ҳайитбоевалар ҳам референдум участкаларига шахсан ўзи бориб, овоз беришган.
Маълумот учун, бўлиб ўтаётган референдумда жами 1 миллион 702 минг 902 нафар андижонлик иштирок этиши кўзда тутилган. Шундан 39 минг 266 нафари овоз бериш жараёнларида илк бор иштирок этаётган ёшлар. Вилоятдаги 32 та референдум участкасида овоз бериш жараёнларини онлайн тарзда тўғридан-тўғри кузатиб бориш имкони яратилган.
Изоҳ (0)