Surxondaryo viloyati Denov tumanida ona o‘z qizchasini ayovsiz kaltaklagani to‘g‘risida xabar berilgandi. “Millar” dasturida ma’lum qilinishicha, ayol farzandini muntazam kaltaklab kelgan.
Qayd etilishicha, qizcha hozirda Denov tumani tibbiyot birlashmasida davolanmoqda. Buvisining so‘zlariga ko‘ra, qiz shu qadar kaltaklanganidan tanib bo‘lmas holatga kelib qolgan.
“Yuzi, hamma joyi ko‘karib yotgan edi, inson bolasini bunday vahshiylarcha urush mumkin emas. Ikkala qizini navbatma-navbat uradi, ichim achiydi, yig‘layman, ilojim yo‘q”, — deydi buvi. Ayolning aytishicha, qizning kaltaklanishi birinchi marta sodir bo‘lmagan, mas’ullar esa ushbu holatni jiddiy e’tiborga olmagan.
“Bir safar ovqat berganimizda ‘nima uchun momongdan ovqat olding?’, deb urdi. Muntazam tayoqlab keladi. Bersin mayli, o‘zimiz boqamiz. Onalikdan mahrum qilsin, u onalikka noloyiq”, — deya ta’kidlaydi buvi.
Qizning onasi ruhiy kasalliklar shifoxonasidagi tekshiruvlarga jalb qilingani sabab u bilan suhbatlashishning imkoni bo‘lmagan. Neyrojarroh Fahriddin Xo‘janazarovga ko‘ra, hozirda qizning ahvoli nisbatan qoniqarli, dinamikada umumiy holati ijobiy.
Holat yuzasidan Denov tumani IIB huzuridagi Tergov bo‘limi tomonidan tergovga qadar tekshiruv harakatlari olib borilmoqda. Tergovga qadar tekshiruv harakatlari Surxondaryo viloyati Ichki ishlar boshqarmasi tomonidan nazoratga olingan.
Mart oxirlarida Toshkent shahar Yangihayot tumanida sportchi erkak o‘z xotini va bolasini ayovsiz kaltaklagani haqida xabar berilgan edi. Keyinroq mazkur holat bo‘yicha yangi tafsilotlar ochiqlangan. Shuningdek, Samarqandda farzandini qiynoqqa solgan ayolga nisbatan jinoyat ishi qo‘zg‘atilgandi.
Izoh (0)