O‘zbekiston prezidentining Afg‘oniston bo‘yicha maxsus vakili Ismatulla Ergashev hamda Buyuk Britaniya bosh vazirining Afg‘oniston va Pokiston bo‘yicha maxsus vakili Endi Makkubri o‘rtasida videokonferensaloqa shaklida uchrashuv bo‘lib o‘tdi. Bu haqda “Dunyo” agentligi xabar berdi.
.jpg)
TIV maʼlumotiga ko‘ra, suhbat chog‘ida mintaqaviy xavfsizlik masalalari, jumladan, Afg‘onistondagi bugungi vaziyat, shuningdek, ushbu mamlakatdagi vaziyatni tartibga solish bo‘yicha birgalikdagi saʼy-harakatlar muhokama qilingan.
“Afg‘oniston yangi hukumati xalqaro hamjamiyatning asosiy talablarini bajarish, ayniqsa, ayollar va qizlarning mehnat va taʼlim olish huquqlarini taʼminlashi zarurligi qayd etildi”, — deyiladi xabarda.
Endi Makkubri O‘zbekistonning Afg‘oniston bo‘yicha yaxlit mintaqaviy pozitsiyani shakllantirish, mamlakatda uzoq muddatli tinchlik va barqarorlik o‘rnatish, afg‘on xalqiga gumanitar yordam ko‘rsatish borasidagi saʼy-harakatlarini yuqori baholagan.
Shuningdek, O‘zbekiston rahbariyatining BMT shafeligida Xalqaro muzokaralar guruhini tuzish tashabbusini amalga oshirishga alohida eʼtibor qaratilgan.
Toshkent shahrida 7-mart kuni Afg‘oniston bilan qo‘shni davlatlar maxsus vakillarining birinchi uchrashuvi bo‘lib o‘tgandi. O‘shanda Ismatulla Ergashev “maxsus vakillar Afg‘onistondan mamlakatdagi ayollarga ta’lim olish va ishlash huquqini qaytarib berishni talab qiladi”, degan edi.
Bir necha kun oldin O‘zbekistondan afg‘on xalqiga 185 tonnadan ortiq zaruriy oziq-ovqat mahsulotlari ortilgan navbatdagi insonparvarlik yordami yetkazilgani to‘g‘risida xabar berilgandi.
Izoh (0)