Samarqand viloyati Kattaqo‘rg‘on tumanida ayol eri bilan janjallashib qolgani sababli farzandini qiynagani to‘g‘risida xabar berilgandi. Viloyat IIBning ma’lum qilishicha, holat yuzasidan ayolga nisbatan jinoyat ishi qo‘zg‘atilgan.
Ijtimoiy tarmoqlarda tarqalgan videoda ayol bolasini bir qo‘lida ko‘tarib, bo‘ynidan bo‘g‘ib, tasvirga olganini ko‘rish mumkin. “Dadajon, men o‘lyapman de. Bolalarimning jonini olaman”, deb ta’kidlagan ayol.
Viloyat Ichki ishlar boshqarmasi axborot xizmatiga ko‘ra, 2000-yilda tug‘ilgan X.U. Rossiyada ishlayotgan eri bilan o‘rtasida yuzaga kelgan kelishmovchilik oqibatida jahl ustida bolasini qiynab, tasvirga olib, turmush o‘rtog‘iga yuborgan.
Bolalarini qiynagan ayol holati yuzasidan Kattaqo‘rg‘on tumani IIB huzuridagi Tergov bo‘limi tomonidan Jinoyat kodeksining 110-moddasi (qiynash) 2-qismi “a” bandi bilan jinoyat ishi qo‘zg‘atilib, fuqaro X.U.ning himoya huquqi ta‘minlangan holda jinoyat ishida gumonlanuvchi sifatida jalb etilgan.
Hozirda tergov harakatlari olib borilmoqda. Ushbu oila hamda bolalar bilan ishlash uchun mutaxassis psixologlar jalb etilgan.
Izoh (0)