Ukraina maxsus xizmatlari Rossiya prezidenti Vladimir Putinni kamikadze dron bilan o‘ldirmoqchi bo‘ldi, biroq Kreml buni sir tutmoqda. Bu haqda Bild xabar berdi.
Ukraina razvedkachilari Putinning “Rudnevo” sanoat parkiga tashrif buyurishi haqida xabar topib, uning sayohati xaritasini qo‘lga kiritgan. Ukraina kelajak instituti eksperti, siyosatshunos Yuriy Romanenkoning aytishicha, Putinga zarba berish uchun 17 kilogramm portlovchi moddaga ega drondan foydalanilgan va u Rossiyaning barcha havo hujumidan mudofaa tizimlari orqali uchib o‘tgan.
24-aprel kuni Moskva viloyatida 17 kilogramm portlovchi modda bilan Ukrainaniki ekani aytilayotgan UJ-22 Airborn droni halokatga uchragan. Qurilma 800 kilometr masofagacha ucha oladi.
Halokat joyi “Rudnevo” sanoat parkidan 20 kilometr sharqda joylashgan. Dron bortida C4 portlovchi moddalarining 30 ta portlovchi bloki bo‘lgan. M112 tipidagi portlovchi zaryadlar AQSH armiyasi va Kanada kuchlari tomonidan qo‘llanadi.
Romanenko o‘tgan hafta Ukraina razvedkachilari Putinning ushbu parkka borishi haqidagi ma’lumotni va uning harakatlanish xaritasini qo‘lga kiritganini aytgan.
“Biznikilar kamikadze dronini ishga tushirgan, u Rossiyaning barcha havo mudofaa tizimlari ustidan uchib o‘tgan va sanoat parkidan uncha uzoq bo‘lmagan joyda qulagan. Ertalab Kremlda dron haqida ma’lum bo‘lgach, jiddiy shov-shuv boshlangan. Peskov Putin Kremlda ishlashi haqida yangi grafik tuzgan”, — degan Romanenko.
Rossiya Federal xavfsizlik xizmati ma’lumotning sizib chiqishini jiddiy tekshirishni boshlagan. Bild nashriga ko‘ra, Ukraina Putin sanoat parkiga aynan qachon tashrif buyurishini aniq bilmagan.
“Rossiya rahbariga kamikadze dron bilan aniq zarba berish deyarli imkonsiz ish ekani aniq. Bunday dronning Putin to‘xtamoqchi bo‘lgan joyga yetib borishining o‘zi, albatta, diktatorga urilgan tarsakidir”, — dedi nemis siyosatshunosi, Ukrainadagi Genrix Bellya fondining sobiq rahbari Sergey Sumlenniy.
Ta’kidlanishicha, haqiqatan ham, Rossiya prezidenti “Rudnevo” sanoat parkiga tashrif buyuradi. Ammo tashrif 27-aprel sanasiga belgilangan. U sanoat zonasi qurilishi va dron ishlab chiqaruvchilari ko‘rgazmasini ko‘zdan kechirishni rejalashtirgan.
Izoh (0)