Украина махсус хизматлари Путинни ўлдиришга уринди — Bild

Украина махсус хизматлари Россия президенти Владимир Путинни камикадзе дрон билан ўлдирмоқчи бўлди, бироқ Кремль буни сир тутмоқда. Бу ҳақда Bild хабар берди.

Украина разведкачилари Путиннинг “Руднево” саноат паркига ташриф буюриши ҳақида хабар топиб, унинг саёҳати харитасини қўлга киритган. Украина келажак институти эксперти, сиёсатшунос Юрий Романенконинг айтишича, Путинга зарба бериш учун 17 килограмм портловчи моддага эга дрондан фойдаланилган ва у Россиянинг барча ҳаво ҳужумидан мудофаа тизимлари орқали учиб ўтган.

24 апрель куни Москва вилоятида 17 килограмм портловчи модда билан Украинаники экани айтилаётган UJ-22 Airborn дрони ҳалокатга учраган. Қурилма 800 километр масофагача уча олади.

Ҳалокат жойи “Руднево” саноат паркидан 20 километр шарқда жойлашган. Дрон бортида C4 портловчи моддаларининг 30 та портловчи блоки бўлган. М112 типидаги портловчи зарядлар АҚШ армияси ва Канада кучлари томонидан қўлланади.

Романенко ўтган ҳафта Украина разведкачилари Путиннинг ушбу паркка бориши ҳақидаги маълумотни ва унинг ҳаракатланиш харитасини қўлга киритганини айтган.

“Бизникилар камикадзе дронини ишга туширган, у Россиянинг барча ҳаво мудофаа тизимлари устидан учиб ўтган ва саноат паркидан унча узоқ бўлмаган жойда қулаган. Эрталаб Кремлда дрон ҳақида маълум бўлгач, жиддий шов-шув бошланган. Песков Путин Кремлда ишлаши ҳақида янги график тузган”, — деган Романенко.

Россия Федерал хавфсизлик хизмати маълумотнинг сизиб чиқишини жиддий текширишни бошлаган. Bild нашрига кўра, Украина Путин саноат паркига айнан қачон ташриф буюришини аниқ билмаган.

“Россия раҳбарига камикадзе дрон билан аниқ зарба бериш деярли имконсиз иш экани аниқ. Бундай дроннинг Путин тўхтамоқчи бўлган жойга етиб боришининг ўзи, албатта, диктаторга урилган тарсакидир”, — деди немис сиёсатшуноси, Украинадаги Генрих Белля фондининг собиқ раҳбари Сергей Сумленний.

Таъкидланишича, ҳақиқатан ҳам, Россия президенти “Руднево” саноат паркига ташриф буюради. Аммо ташриф 27 апрель санасига белгиланган. У саноат зонаси қурилиши ва дрон ишлаб чиқарувчилари кўргазмасини кўздан кечиришни режалаштирган.