Eron janubi-sharqidagi Sistan va Balujiston viloyatida o‘smir yo‘l-transport hodisasida halok bo‘lganidan keyin politsiya bo‘limi oldida namoyishchilar to‘plandi. Politsiya ularga qarata o‘q uzdi, deb xabar bermoqda “Ozodlik” radiosining Yevropa xizmati.
26-aprelga o‘tar kechasi Siston va Balujiston viloyatining Fanuj shahrida politsiya mashinasi ikki mototsiklchini urib yuborgan. Hodisa oqibatida 16 yoshli mahalliy fuqaro halok bo‘lgan, yana uch kishi jarohatlangan.
Voqeaga javoban mahalliy aholi politsiya bo‘limi oldida norozilik namoyishi uyushtirdi. Xavfsizlik kuchlari olomonga qarata o‘q uzishni boshladi, oqibatda uch kishi yaralandi.
Eron politsiyasi norozilik namoyishi va otishmani tasdiqladi hamda buni ayrim namoyishchilar politsiya bo‘limiga “tosh va shisha otgani” bilan oqladi.
Eslatib o‘tamiz, Siston va Balujiston Eronda o‘tgan yilning kuzidan beri muntazam ravishda hukumatga qarshi namoyishlar o‘tkazilayotgan yagona viloyatdir. Dekabrga kelib, hukumatga qarshi namoyishlar ushbu viloyatdan tashqari deyarli hamma joyda pasaygan edi. Mintaqadagi aksilhukumat harakatlarining asosiy yo‘nalishi viloyatning maʼmuriy markazi Zaxidon shahrida olib borilmoqda.
Erondagi ommaviy namoyishlar
Eronda ommaviy norozilik namoyishlari sentabr oyida boshlangan edi. Ularning boshlanishiga 22 yoshli Mahsa Aminiyning o‘limi sabab bo‘ldi — u hijobni “noto‘g‘ri” o‘ragani uchun politsiya o‘rinbosari tomonidan hibsga olinganidan ko‘p o‘tmay vafot etgan. Dastlab, namoyishchilar gender tenglik talab qilishdi, lekin ko‘p o‘tmay ularning talablari keng ko‘lamli islohotlar va rejim o‘zgarishini o‘z ichiga ola boshladi.
Eron hukumati norozilik namoyishlarini o‘ta shafqatsizlik bilan jumladan, harbiy qurollar yordamida bostirdi. O‘n minglab odamlar hibsga olingan; huquq himoyachilarining so‘zlariga ko‘ra, xavfsizlik kuchlari bilan to‘qnashuvlarda 450 dan ortiq namoyishchi halok bo‘lgan. Ayblovlar bo‘yicha yuzdan ortiq odam o‘limga hukm qilinishi mumkin.
Bundan tashqari Eronda hukumatga qarshi namoyishlarda qatnashgan o‘quvchi qizlarning zaharlanishi holatlari kuzatilmoqda.
Izoh (0)