“Uchinchi chechen urushi”: Ukraina armiyasida 200 ga yaqin chechen jang qilmoqda — Politico

Ukraina Qurolli kuchlari safida Chechenistondan 150-200 ga yaqin askar jang qilmoqda. E’tiborlisi, ular asosan Birinchi va Ikkinchi Chechen urushlarida qatnashgan jangchilarning avlodlaridir. Bu haqda Politico xabar berdi.

Nashr ma’lumotlariga ko‘ra, Ukraina tomonidagi urushda uchta chechen bo‘linmasi qatnashmoqda: Joxar Dudayev bataloni, shayx Mansur bataloni va uchinchisi Ukraina harbiy razvedkasi bilan hamkorlik qiluvchi “maxfiyroq” bo‘linma. Uning ishtirokchilari qora kiyingan va Kiyevning xavfsiz chegaralarida ham qurollar bilan harakatlanadi.

Batalonlar Birinchi va Ikkinchi chechen urushlarida qatnashgan va keyinchalik ko‘chib ketgan jangchilarning o‘g‘illari va nabiralaridan iborat.

Politico suhbatlashgan ikki chechen Checheniston uchun Ukraina tomonida jang qilayotganini aytgan. Ular Ukraina bilan mojaroda Rossiyaning mag‘lubiyati muqarrarligi, bu Shimoliy Kavkazda qurolli qo‘zg‘olonga olib kelishini qo‘shimcha qilgan.

“Ishoning, qachonki Rossiya Ukraina bilan urushda mag‘lub bo‘lsa, u davlat sifatida mavjud bo‘lishi mumkin emas. U parchalanadi”, — deydi ismi anonim chechen jangchisi.

Ularning fikricha, keyinchalik Chechenistonda harbiy to‘ntarish uyushtirish uchun Rossiya qurolli kuchlarini mag‘lub etish kerak.

“Rossiya mast qo‘shniga o‘xshaydi. Bir kuni u uyingizga keladi va uni yoqib yubormoqchi bo‘ladi. Siz uni ushlaysiz, u qochib ketadi. Yana bir kuni u hushyor bo‘lib qaytib keladi va kechirim so‘raydi. Keyin esa mast holda to‘pponcha bilan qaytib, xotin va bolalaringizni o‘ldiradi”, — deydi 45 yoshli Torto taxallusli chechen qo‘mondoni.

“Bu Uchinchi Chechen urushi va bu safar biz g‘alaba qozonamiz”, — deydi Maga taxallusli 20 yoshli chechen. Hozirda ular asosan Baxmutdagi janglarda qatnashmoqda.

Boshqa xorijiy tuzilmalardan farqli o'laroq, chechen ko‘ngillilari Ukraina xalqaro legioniga kirmaydi.

2022-yil oktabr oyida Checheniston rahbari Ramzan Qodirov urush zonasida Rossiya tomonida 10 ming chechen jang qilayotganini aytgandi. Keyin u Chechenistondan yana 70 ming jangchining frontga borishga tayyorligini e’lon qilgandi.