Bugun, 27-aprel kuni Shavkat Mirziyoyev ikkinchi Toshkent xalqaro investitsiya forumida ishtirok etadi. Bu haqda Prezident matbuot kotibi xabar berdi. Davlat rahbari forumning yalpi majlisida nutq so‘zlaydi.
Ma’lum qilinishicha, sessiyada Islom taraqqiyot banki prezidenti Muhammad bin Sulaymon al-Jassir, Qirg‘iziston Vazirlar Mahkamasi raisi — Prezident administratsiyasi rahbari Aqilbek Japarov, BMT Bosh kotibining o‘rinbosari Olga Algayerova, Birlashgan Arab Amirliklari energetika va infratuzilma vaziri Suxayl al-Mazruiy, Vengriya iqtisodiy rivojlanish vaziri Marton Nad, ACWA Power kompaniyasi boshqaruvi raisi Muhammad Abdulla Abunayyan ham qatnashadi. Sessiyaga taniqli britaniyalik jurnalist Jonatan Charlz moderatorlik qiladi.
Shavkat Mirziyoyev forum doirasida qator ikki tomonlama uchrashuvlar o‘tkazishi ham rejalashtirilgan.
Umuman, tadbirda 70 mamlakatdan kelgan 2,5 mingga yaqin ishbilarmon doiralar va bank-moliya sohasi vakillari ishtirok etadi.
TIIF-2023
27—28-aprel kunlari poytaxtda ikkinchi Toshkent xalqaro investitsiya forumi (TIIF-2023) bo‘lib o‘tadi. Ma’lumotlarga ko‘ra, dastlabki forumda dunyoning 56 mamlakatidan ikki mingdan ortiq ishtirokchilar — yirik investorlar va yuqori martabali mehmonlar qatnashgan.
Navbatdagi tadbir qatnashchilarining soni yanada oshishi kutilmoqda. Forum davomida O‘zbekiston va Markaziy Osiyoning investitsiyaviy salohiyatini atroflicha ochib berishga qaratilgan yalpi majlis, ekspertlarning 30 dan ortiq bahs-munozaralari, panel muloqotlari, davra suhbatlari va B2B muzokaralari o‘tkazilishi rejalashtirilgan.
Izoh (0)