Бугун, 27 апрель куни Шавкат Мирзиёев иккинчи Тошкент халқаро инвестиция форумида иштирок этади. Бу ҳақда Президент матбуот котиби хабар берди. Давлат раҳбари форумнинг ялпи мажлисида нутқ сўзлайди.
Маълум қилинишича, сессияда Ислом тараққиёт банки президенти Муҳаммад бин Сулаймон ал-Жассир, Қирғизистон Вазирлар Маҳкамаси раиси — Президент администрацияси раҳбари Ақилбек Жапаров, БМТ Бош котибининг ўринбосари Олга Алгаерова, Бирлашган Араб Амирликлари энергетика ва инфратузилма вазири Сухайл ал-Мазруий, Венгрия иқтисодий ривожланиш вазири Мартон Над, АCWА Power компанияси бошқаруви раиси Муҳаммад Абдулла Абунайян ҳам қатнашади. Сессияга таниқли британиялик журналист Жонатан Чарльз модераторлик қилади.
Шавкат Мирзиёев форум доирасида қатор икки томонлама учрашувлар ўтказиши ҳам режалаштирилган.
Умуман, тадбирда 70 мамлакатдан келган 2,5 мингга яқин ишбилармон доиралар ва банк-молия соҳаси вакиллари иштирок этади.
ТIIF-2023
27—28 апрель кунлари пойтахтда иккинчи Тошкент халқаро инвестиция форуми (ТIIF-2023) бўлиб ўтади. Маълумотларга кўра, дастлабки форумда дунёнинг 56 мамлакатидан икки мингдан ортиқ иштирокчилар — йирик инвесторлар ва юқори мартабали меҳмонлар қатнашган.
Навбатдаги тадбир қатнашчиларининг сони янада ошиши кутилмоқда. Forum давомида Ўзбекистон ва Марказий Осиёнинг инвестициявий салоҳиятини атрофлича очиб беришга қаратилган ялпи мажлис, экспертларнинг 30 дан ортиқ баҳс-мунозаралари, панел мулоқотлари, давра суҳбатлари ва B2B музокаралари ўтказилиши режалаштирилган.
Изоҳ (0)