Andijon viloyati Baliqchi tumanida 25-aprel kuni yo‘l-transport hodisasi yuz bergan. Oqibatda bir nafar avtoyo‘l xodimi og‘ir tan jarohatlari natijasida vafot etgan. Bu haqda Baliqchi tumani hokimligi axborot xizmati xabar bermoqda.
Maʼlum bo‘lishicha, 25-aprel kuni Baliqchi tuman yo‘llardan foydalanish unitar korxonasi umum-foydalanuvidagi 4R-112 Farg‘ona halqa avtomobil yo‘lining 109-kilometrida korxona direktori, bosh va harakat xavfsizligi muhandislari, mazkur yo‘lga biriktirilgan 54-yo‘l bo‘limi ishchi xodimlari yo‘l-patrul xizmatchisi nazorati ostida yo‘l belgilari bilan taʼminlangan holda joriy taʼmirlash ishlari olib borishgan. Taʼmirlash ishlari vaqtida, yaʼni soat 20:30 larda “Jartepa” mahallasida yashovchi B.Sh. spirtli ichimlik taʼsirida boshqaruvida bo‘lgan “VAZ 2101” rusumli avtomashinasida yo‘l-transport hodisasi sodir etgan.
Natijada korxonaning ikki nafar ishchisi og‘ir tan jarohat olgan holda tuman shoshilinch tez tibbiy yordam bo‘limiga olib borilgan. Biroq bir nafar xodim ko‘rsatilgan birinchi tibbiy yordamga qaramasdan olgan tan jarohatlari natijasida shifoxonada vafot etgan. Ikkinchi xodim esa ayni paytda shifokorlarning doimiy nazorati bo‘lib turibdi.
Mazkur holat yuzasidan huquqni muhofaza qiluvchi organlar tomonidan tergovga qadar tekshiruv ishlari olib borilmoqda.
Hokimlik axborot xizmatining taʼkidlashicha, yo‘lda taʼmirlash va tiklash ishlari Vazirlar Mahkamasining 2011-yil 31-dekabrdagi qarorida belgilangan tartibda hamda Baliqchi tuman yo‘llardan foydalanish unitar korxonasining jamoa shartnomasi asosida olib borilgan.
Avvalroq Marhamat tumanida ishdan tashqari vaqt — kechasi 21:00 dan keyin ishga chaqirilgan obodonlashtirish xodimi yo‘lda YTHga uchrab, vafot etgani xabar qilingandi.
Izoh (0)