Instagram’da Dili.me nomi bilan tanilgan vayner Dilshod Nazarov bu yil 24 yoshni qarshilaydi. Hayotda ko‘plab qiyinchiliklarni boshdan kechirgan va qisqa vaqtda mashhurlikka erishgan Dilshod Nazarov haqida ko‘pchilik bilmaydigan ma’lumotlar bisyor.
“Xonanda bo‘lishni istagandim”
Dilshod Nazarov san’atdan butunlay yiroq bo‘lgan insonlar oilasida dunyoga kelgan. Uning opasi, uka va singlisi bor. Bolalikdan san’atga qiziqqan Dilshod Nazarov qo‘shiqchi bo‘lishni orzu qilgan. Maktabni bitirgan yili poytaxtdagi estrada va sirk kollejining vokal yo‘nalishiga hujjat topshiradi. Ammo ovozidagi bo‘g‘ilish sabab uni bu yo‘nalishda o‘qishga qabul qilishmaydi.
— Oila a’zolarim soliq sohasida ishlashimni xohlashgan. Ammo men qo‘shiqchi bo‘lishni istaganman. Kollejga hujjatlarimni topshirganimda ustozlar “Ovozingda shamollash bor, ijodiy imtihonga kiritishmaydi”, deyishgan. Davolanib, bir oydan keyin imtihon topshirganman. Ammo baribir vokal yo‘nalishiga qabul qilishmagan, shundan so‘ng aktyorlik bo‘yicha o‘qishga majbur bo‘lganman, — deydi Dilshod Nazarov.
“Ishlashga majbur edim”
Dilshod Nazarov oilasidagi moliyaviy qiyinchiliklar sabab 17 yoshidan mustaqil pul topishga va ota-onasiga ko‘maklashishga qaror qilgan. U kollejni tamomlagan yili “Tantana” bolalar studiyasiga o‘qituvchi sifatida ishga qabul qilingan.
— Oilada to‘rtta farzandmiz, dadam bir umr davlat ishida ishlagan. Faqat oylik bilan ro‘zg‘or tebratish oson emas. “Tantana”da drama aktyorligidan dars berardim. Topgan pulim u qadar katta bo‘lmasa-da, u yerdagi faoliyatim sabab ko‘p konsertlarda ishtirok etganman. Kollejni tamomlab san’at institutiga hujjat topshirganman. Mahoratimga ishonardim, ammo ijodiy imtihon va test natijalari kutganimdek bo‘lmagan. Birinchi yil yiqilgach, tushkunlikka tushib qolganman, — deydi Dilshod Nazarov.
“Tirikchilikning aybi yo‘q”
Dilshod Nazarov vaynerlik faoliyatini boshlagunga qadar taksi haydovchisi bo‘lgani va ovqat tashish bilan shug‘ullanganini yashirmaydi.
— Pul topish kerak, tirikchilikning aybi yo‘q, deb har qanday ishni qilaverardim. Kunduzi kirakashlik, kechga yaqin esa ovqat tashish xizmatida ishlardim. Orada to‘ylar chiqsa, disk qo‘yish bilan ham shug‘ullanardim. Kuniga uzog‘i 100-150 ming so‘m pul topardim. 50 ming so‘mga benzin olsam, 100 mingni ro‘zg‘or uchun sarflardim. Ishga chiqmagan kunim ro‘zg‘orimiz uchun katta yo‘qotish bo‘lardi, — deydi bloger.
“Uch yil ham san’at institutiga kirolmaganman”
Dilshod Nazarov san’atkor bo‘lish umidida uch marta O‘zbekiston davlat san’at va madaniyat institutiga hujjat topshiradi. Ammo birorta urinishi muvaffaqiyatli kechmaydi.
— Kutubxonachilik yo‘nalishiga hujjat topshirishimni aytishgan. Chunki u fakultetda kirish ballari ancha past bo‘lar ekan. Ammo “O‘qisam aktyorlik bo‘yicha o‘qiyman, bo‘lmasa kerak emas”, deb boshqa yo‘nalishda o‘qishni istamaganman. O‘ylab qarasam, yaxshi hamki institutga qabul qilishmagan ekan. Agar institutda o‘qiganimda, bugungi natijalarga erisholmagan bo‘larmidim, — deydi Dilshod Nazarov.
“Pul berib, serialda rol ijro etganman”
Dilshod Nazarov “konfet” aktyor sifatida serialda suratga tushganini kulib eslaydi.
— Tan olaman, taksichilik qilib yurgan paytlarimda bitta tanishim serial olinayotgani haqida aytib qolgan. “Bedor tuyg‘ular” nomli serialda sotuvchi yigit rolini ijro etganman. Bu rolda suratga tushishim uchun 100 ming so‘m berganman. Ammo serial qaysi kanalda namoyish etilganini ham bilmayman, — deydi bloger.
“Mashinam bir necha marta ag‘darilgan”
Dilshod Nazarov mudhish avtohalokatga uchragani va haligacha o‘sha yo‘ldan o‘tsa, yuragi tez urib ketishi haqida so‘zlab berdi.
— Ko‘k Spark rusumidagi mashinam bor. U bilan juda ko‘p sarguzashtlarni boshdan kechirganmiz. Gangadagi ko‘prikka chiqayotganimda xayolimga pastda yo‘l-patrul xizmati xodimlari bo‘lsa kerak, degan o‘y keldi. Shoshib, xavfsizlik kamarini taqib oldim. Oradan hech qancha masofa yurmaganimdan keyin ortimdan mashina kelib urildi. Zarbning kuchidan mashinam 3-4 marta ag‘darilib ketdi. Birinchi videoyim ana shu bo‘lgan. Avtohalokat bilan bog‘liq video barcha Telegram kanallarida tarqalgan. Yaxshi hamki, xavfsizlik kamarini taqqan ekanman, bo‘lmasa ahvolim yanada yomonlashishi mumkin edi, — deydi Dilshod Nazarov.
“Bitta to‘yda 30-40 ming berishardi”
Avtohalokat sodir bo‘lgan paytda u Yulduz Usmonovani to‘ylarda parodiya qilib yuradigan Rustamxo‘ja Usmonovning jamoasida disk qo‘yish bilan ham shug‘ullanardi. Avtohalokatga uchragach, jamoani tark etishga qaror qildi.
— Disk qo‘yganim uchun ko‘p pul olmasdim. Bitta to‘yda 30-40 ming so‘m pul berishardi. Ammo bu ishda ham o‘zimni sinab ko‘rganman. Odam ishlashdan og‘rinmasligi kerak ekan. Hayotdagi har bir voqea insonga dars bo‘lar ekan, — deydi bloger.
Karantin davri omadli keldi
Boshqa blogerlar singari Dilshod Nazarovga ham karantin davri omadli keldi. U ham shunchaki zerikish sabab video olib, ijtimoiy tarmoqqa joyladi.
— Bloger va vayn sohalari nima ekanligini deyarli bilmasdim. Undan pul topish mumkinligi esa xayolimga ham kelmagan. Taksichilik qilolmay qolgan kunlarim bo‘sh vaqtim juda ko‘p bo‘lardi. Shunda raqs tushib, tarmoqqa joylash istagi paydo bo‘lgan. Birinchi videoyimda shunchaki raqs tushganman. Yaxshi ko‘rilgan, ammo tanqid qilganlar ham ko‘p bo‘lgan. “O‘g‘il bolaga yarashadigan ish qilsang bo‘lmaydimi?” deyishganidan keyin hazil vayn olish haqida o‘ylaganman. O‘sha paytda giv musobaqalari rosa ko‘paygan payt edi. Onamdan dadamning kostyum-shimlarini berib turishlarini so‘rab, hazil video olganman. Video bir kechada 100 ming marotaba tomosha qilingan, — deydi bloger.
Tadbirkorlikda ham omadi keldi
Dilshod Nazarov hozirgi kunda nafaqat vayn va blogerlik, balki tadbirkorlik bilan ham shug‘ullanadi. Uning to‘yxonasi, restorani va do‘konlari bor.
Dili.me shunchaki “Dilshodman” degani
Uni Dili.me taxallusini tanlashi bejiz emas. Chunki bolalikdan do‘stlari uni Dili deb ismini qisqartirib chaqirishgan. Ijodkorning aytishicha, Dili.me “Dilshodman” nomining qisqartmasi ekan.
Tergovga tortilish sababi
Mart oyida uning bezorilik qilgani va kuyoviga yetkazgan tan jarohati sabab unga nisbatan jinoyat ishi qo‘zg‘atilgani haqida xabarlar tarqalgandi. Ammo bloger oilaviy kelishmovchilik qanday yechim topgani haqida ma’lumot bermadi.
Izoh (0)