“Yerdagi otalar”ga aylangan “Osmondagi bolalar”. Zulfiqor Musoqovning 21 yil kutilgan filmi taqdimotidan reportaj (video)

Bundan roppa-rosa 21 yil avval katta ekranlarga chiqarilgan “Osmondagi bolalar” filmi o‘z davrining eng kassabop filmlaridan biri bo‘lgan. Filmning ikkinchi qismi suratga olinishi u qadar yangilik emas, ammo hamma rejissor ham uchinchi qismni suratga olishga jur’at etolmaydi. Zulfiqor Musoqov ko‘plab kino muxlislarining talabiga ko‘ra “Osmondagi bolalar-3“ filmini suratga oldi. 

Film premyerasiga kinoijodkorlar, san’at vakillari va muxlislar tashrif buyurishdi. 16 yoshida Javohir, Lola, Xurshid, Nargiz va Baxtiyor rollarini ijro etgan ijodkorlarning bari ulg‘aygan va ularning hech biri san’at sohasida faoliyat yuritishmaydi. 

Taqdimotdan avval ular  “Kinochilar uyi” hovlisidagi qizil yo‘lakdan o‘tishdi va kinoixlosmandlari bilan suratga tushishdi.

Filmning suratga olish ishlari 2022-yilning aprel oyida boshlanib, 9 oy davom etdi.

— Tomoshabinlar “Osmondagi bolalar” ulg‘ayganmi, ularning keyingi hayoti qanday kechgan degan savollarni ko‘p berishardi. Bu film qaysidir ma’noda shu savollarga javob berish uchun olindi. Suratga olish ishlari naqd 9 oy davom etdi. Tomoshabinlar sevimli qahramonlarini sog‘inishganini sezdim, —  deydi rejissor Zulfiqor Musoqov.

Filmda asosiy rollarni Temur Musoqov, Nargiza Alimova, Davron G‘ulomov, Kristina Toirova, Aziz Sultonov kabi qadrdon ijodkorlar suratga tushishgan. Afsuski, ular orasida Hamdam rolini ijro etgan aktyor Muzaffar Sa’dullayevni uchratmadik. Buning sababini rejissor quyidagicha izohladi.

— Muzaffar sog‘lig‘idagi muammolar sabab, filmda suratga tusholmasligini aytdi. Shu bois, rolga boshqa aktyorni oldik, — deydi rejissor.

Filmda Xayrulla Sa’diyev, Bahrom Matjonov, Karim Mirxodiyev, Bobur Yo‘ldoshev, Zuhra Ashurova, Turg‘un Beknazorov kabi aktyorlar ham suratga tushishdi. Dilnoza Kubayevaning Oypopuk roli ham o‘ziga xosligi bilan ajralib turdi. Afsuski, aktrisa tobi yo‘qligi bois premyerada ishtirok etolmadi.

Film haqida har bir tomoshabinning o‘z subyektiv fikri bor. Ayrimlarga qahramonlarning bugungi hayoti haqidagi film manzur keldi. Ayrimlar esa qadrdon qahramonlarini ekranda uchratishmaganini aytib o‘tishdi. Shu bois filmni yaxshi yoki yomon deyishdan yiroqmiz. Uni katta ekranda tomosha qilish va ijodkorlar mehnatiga holis baho berish kerak.

Quyida reportajni to‘liq tomosha qilishingiz mumkin.