Санъат институтига киролмаган, даҳшатли аварияга учраган ва киракашлик билан рўзғор тебратган Dili.me 24 ёшда (фото, видео)
Instagramъда Dili.me номи билан танилган вайнер Дилшод Назаров бу йил 24 ёшни қаршилайди. Ҳаётда кўплаб қийинчиликларни бошдан кечирган ва қисқа вақтда машҳурликка эришган Дилшод Назаров ҳақида кўпчилик билмайдиган маълумотлар бисёр.
“Хонанда бўлишни истагандим”
Дилшод Назаров санъатдан бутунлай йироқ бўлган инсонлар оиласида дунёга келган. Унинг опаси, ука ва синглиси бор. Болаликдан санъатга қизиққан Дилшод Назаров қўшиқчи бўлишни орзу қилган. Мактабни битирган йили пойтахтдаги эстрада ва цирк коллежининг вокал йўналишига ҳужжат топширади. Аммо овозидаги бўғилиш сабаб уни бу йўналишда ўқишга қабул қилишмайди.
— Оила аъзоларим солиқ соҳасида ишлашимни хоҳлашган. Аммо мен қўшиқчи бўлишни истаганман. Коллежга ҳужжатларимни топширганимда устозлар “Овозингда шамоллаш бор, ижодий имтиҳонга киритишмайди”, дейишган. Даволаниб, бир ойдан кейин имтиҳон топширганман. Аммо барибир вокал йўналишига қабул қилишмаган, шундан сўнг актёрлик бўйича ўқишга мажбур бўлганман, — дейди Дилшод Назаров.
“Ишлашга мажбур эдим”
Дилшод Назаров оиласидаги молиявий қийинчиликлар сабаб 17 ёшидан мустақил пул топишга ва ота-онасига кўмаклашишга қарор қилган. У коллежни тамомлаган йили “Тантана” болалар студиясига ўқитувчи сифатида ишга қабул қилинган.
— Оилада тўртта фарзандмиз, дадам бир умр давлат ишида ишлаган. Фақат ойлик билан рўзғор тебратиш осон эмас. “Тантана”да драма актёрлигидан дарс берардим. Топган пулим у қадар катта бўлмаса-да, у ердаги фаолиятим сабаб кўп концертларда иштирок этганман. Коллежни тамомлаб санъат институтига ҳужжат топширганман. Маҳоратимга ишонардим, аммо ижодий имтиҳон ва тест натижалари кутганимдек бўлмаган. Биринчи йил йиқилгач, тушкунликка тушиб қолганман, — дейди Дилшод Назаров.
“Тирикчиликнинг айби йўқ”
Дилшод Назаров вайнерлик фаолиятини бошлагунга қадар такси ҳайдовчиси бўлгани ва овқат ташиш билан шуғулланганини яширмайди.
— Пул топиш керак, тирикчиликнинг айби йўқ, деб ҳар қандай ишни қилаверардим. Кундузи киракашлик, кечга яқин эса овқат ташиш хизматида ишлардим. Орада тўйлар чиқса, диск қўйиш билан ҳам шуғулланардим. Кунига узоғи 100-150 минг сўм пул топардим. 50 минг сўмга бензин олсам, 100 мингни рўзғор учун сарфлардим. Ишга чиқмаган куним рўзғоримиз учун катта йўқотиш бўларди, — дейди блогер.
“Уч йил ҳам санъат институтига киролмаганман”
Дилшод Назаров санъаткор бўлиш умидида уч марта Ўзбекистон давлат санъат ва маданият институтига ҳужжат топширади. Аммо бирорта уриниши муваффақиятли кечмайди.
— Кутубхоначилик йўналишига ҳужжат топширишимни айтишган. Чунки у факультетда кириш баллари анча паст бўлар экан. Аммо “Ўқисам актёрлик бўйича ўқийман, бўлмаса керак эмас”, деб бошқа йўналишда ўқишни истамаганман. Ўйлаб қарасам, яхши ҳамки институтга қабул қилишмаган экан. Агар институтда ўқиганимда, бугунги натижаларга эришолмаган бўлармидим, — дейди Дилшод Назаров.
“Пул бериб, сериалда рол ижро этганман”
Дилшод Назаров “конфет” актёр сифатида сериалда суратга тушганини кулиб эслайди.
— Тан оламан, таксичилик қилиб юрган пайтларимда битта танишим сериал олинаётгани ҳақида айтиб қолган. “Бедор туйғулар” номли сериалда сотувчи йигит ролини ижро этганман. Бу ролда суратга тушишим учун 100 минг сўм берганман. Аммо сериал қайси каналда намойиш этилганини ҳам билмайман, — дейди блогер.
“Машинам бир неча марта ағдарилган”
Дилшод Назаров мудҳиш автоҳалокатга учрагани ва ҳалигача ўша йўлдан ўца, юраги тез уриб кетиши ҳақида сўзлаб берди.
— Кўк Spark русумидаги машинам бор. У билан жуда кўп саргузаштларни бошдан кечирганмиз. Гангадаги кўприкка чиқаётганимда хаёлимга пастда йўл-патрул хизмати ходимлари бўлса керак, деган ўй келди. Шошиб, хавфсизлик камарини тақиб олдим. Орадан ҳеч қанча масофа юрмаганимдан кейин ортимдан машина келиб урилди. Зарбнинг кучидан машинам 3-4 марта ағдарилиб кетди. Биринчи видеойим ана шу бўлган. Автоҳалокат билан боғлиқ видео барча Telegram каналларида тарқалган. Яхши ҳамки, хавфсизлик камарини таққан эканман, бўлмаса аҳволим янада ёмонлашиши мумкин эди, — дейди Дилшод Назаров.
“Битта тўйда 30-40 минг беришарди”
Автоҳалокат содир бўлган пайтда у Юлдуз Усмоновани тўйларда пародия қилиб юрадиган Рустамхўжа Усмоновнинг жамоасида диск қўйиш билан ҳам шуғулланарди. Автоҳалокатга учрагач, жамоани тарк этишга қарор қилди.
— Диск қўйганим учун кўп пул олмасдим. Битта тўйда 30-40 минг сўм пул беришарди. Аммо бу ишда ҳам ўзимни синаб кўрганман. Одам ишлашдан оғринмаслиги керак экан. Ҳаётдаги ҳар бир воқеа инсонга дарс бўлар экан, — дейди блогер.
Карантин даври омадли келди
Бошқа блогерлар сингари Дилшод Назаровга ҳам карантин даври омадли келди. У ҳам шунчаки зерикиш сабаб видео олиб, ижтимоий тармоққа жойлади.
— Блогер ва вайн соҳалари нима эканлигини деярли билмасдим. Ундан пул топиш мумкинлиги эса хаёлимга ҳам келмаган. Таксичилик қилолмай қолган кунларим бўш вақтим жуда кўп бўларди. Шунда рақс тушиб, тармоққа жойлаш истаги пайдо бўлган. Биринчи видеойимда шунчаки рақс тушганман. Яхши кўрилган, аммо танқид қилганлар ҳам кўп бўлган. “Ўғил болага ярашадиган иш қилсанг бўлмайдими?” дейишганидан кейин ҳазил вайн олиш ҳақида ўйлаганман. Ўша пайтда гив мусобақалари роса кўпайган пайт эди. Онамдан дадамнинг костюм-шимларини бериб туришларини сўраб, ҳазил видео олганман. Видео бир кечада 100 минг маротаба томоша қилинган, — дейди блогер.
Тадбиркорликда ҳам омади келди
Дилшод Назаров ҳозирги кунда нафақат вайн ва блогерлик, балки тадбиркорлик билан ҳам шуғулланади. Унинг тўйхонаси, ресторани ва дўконлари бор.
Dili.me шунчаки “Дилшодман” дегани
Уни Dili.me тахаллусини танлаши бежиз эмас. Чунки болаликдан дўстлари уни Дили деб исмини қисқартириб чақиришган. Ижодкорнинг айтишича, Dili.me “Дилшодман” номининг қисқартмаси экан.
Терговга тортилиш сабаби
Март ойида унинг безорилик қилгани ва куёвига етказган тан жароҳати сабаб унга нисбатан жиноят иши қўзғатилгани ҳақида хабарлар тарқалганди. Аммо блогер оилавий келишмовчилик қандай ечим топгани ҳақида маълумот бермади.
