Тошкент вилояти, Оҳангарон туманида жойлашган контейнерли юкларни ортиб тушириш майдони ва ошхона кимошди савдосида сотилди. Маълумотлар “E-auksion” порталида эълон қилинган.
Лот аукционга Давлат активларини бошқариш агентлиги Тошкент вилояти ҳудудий бошқармаси томонидан жойлаштирилган эди.
Ушбу нотурар жойнинг қурилган йили номаълум. Ер участкасининг умумий майдони — 8,5 гектар. Биноларнинг майдони — 3294,80 квадрат метр. Унда сув ва электр таъминоти мавжуд. Газ ва канализация тизими эса йўқ.
Аукционга қўйилган бинонинг бошланғич баҳоси 14,5 млрд сўм эди. 25 апрель куни бўлиб ўтган савдоларда у 15,2 млрд сўмга сотилди.
Онлайн савдода 1 нафар савдогар — My Freighter авиакомпанияси иштирок этган ва аукцион ғолиби бўлган.
Компания ҳақида
2020 йилда ташкил қилинган My Freighter компанияси Ўзбекистон ва Марказий Осиёдаги энг тез ривожланаётган ҳаво юк компанияларидан биридир. Компания устав фонди — 417,6 трлн сўм.
My Freighter Хитойнинг ўнта йирик шаҳрида ўз омборларига эга, юк йиғиш пунктлари Европада Чехия, Луксембург, Германия, Франция, Италия ва Нидерландияда, шунингдек, БААда, Жанубий Кореяда, Россия, Бразилия ва Вьетнамда жойлашган.
Шунингдек, My Freighter Centrum Air бренди остида йўловчи рейсларини ҳам амалга оширади.
Centrum Air компаниясида 250 нафар маҳаллий ва 400 нафардан ортиқ хорижий мутахассис ишлайди.
Айни пайтда авиакомпания ҳар бири 180 кишига мўлжалланган бешта Boeing 737 ва А320 самолётлари ёрдамида йўловчиларга хизмат кўрсатади. 2023 йилда компания ўз паркини 20 та самолётга кенгайтиришни, кейинги уч йилда эса бу рақамни 100 тага етказишни режалаштирмоқда.
Изоҳ (0)