“Magnit” O‘zbekistondagi do‘konlarini to‘rt martaga ko‘paytiradi

Rossiyaning “Magnit” kompaniyasi 2023-yilda O‘zbekistonda MCosmetic kosmetika do‘konlari tarmog‘ining savdo nuqtalarini 80 taga yetkazishni rejalashtirmoqda. Ayni paytda ular 20 ta. 

“Magnit” O‘zbekistonda o‘zining birinchi do‘konini bir yil avval 2022-yilning aprel oyida ochgan. Hozirda respublikadagi MCosmetic tarmog‘ida 20 ta savdo nuqtalari mavjud. Yil oxirigacha Farg‘ona, Samarqand, Namangan va Marg‘ilonda do‘konlar paydo bo‘ladi.

“Magnit Markaziy Osiyo” bosh direktori Dmitriy Kosachenko kompaniya ushbu bozorda yaxshi rivojlanish salohiyatini ko‘rayotganini ta’kidladi. 

“Mamlakatdagi do‘konlar ajoyib natijalarni ko‘rsatmoqda, yil davomida ular operatsion jarayonlarni sozlash va mahalliy yetkazib beruvchilar bazasini oshirishga muvaffaq bo‘ldi”, — deydi Kosachenko. 

“Magnit Kosmetik” Rossiyadagi eng yirik kosmetika va dorixona do‘konlari tarmog‘laridan biri hisoblanadi.

O‘zbekiston “Magnit” uchun Rossiyadan tashqari bo‘lgan birinchi bozordir.