Lada avtomobillarini O‘zbekistonda qayta yig‘ish imkoniyati ko‘rib chiqilmoqda

AvtoVAZ O‘zbekistonda avtomobillarni yig‘ishni qayta yo‘lga qo‘yish imkoniyatini ko‘rib chiqmoqda. Bu haqda “Ria Novosti” xabar berdi. 

Kompaniya prezidenti Maksim Sokolov hamkor zavod konveyerida Lada Vesta yig‘ilishi mumkinligini aytib o‘tdi. 

“Hozirda hamkorimiz bilan birgalikda avtomobillarimizni yig‘ishni tiklash bo‘yicha eng yaqin rejalarni faol ko‘rib chiqmoqdamiz. Bundan tashqari, rejalar orasida yangi avlod Lada Vesta modeli ham bor”, — deydi Sokolov. 

Uning so‘zlariga ko‘ra, kompaniya kelgusida O‘zbekistonda avtomobil yig‘ishni mahalliylashtirish darajasini chuqurlashtirmoqchi. 

“Xususan, payvandlash va bo‘yash. Biz hamkorlarimiz bilan bu borada ham muzokaralar olib bormoqdamiz”, — deya tushuntirdi u.

2021-yil sentabr oyida AvtoVaz O‘zbekistonning “Roodell” kompaniyasi bilan birgalikda “Jizzax” erkin iqtisodiy zonasida joylashgan “ADM Jizzax” zavodida Lada avtomobillarini seriyali yig‘ishni boshlagandi. Keyinchalik urush oqibatida ishlab chiqarish to‘xtatilgandi.