Samarqand aeroporti Yevropaning yirik aviakompaniyalari bilan reyslar ochish bo‘yicha muzokaralar olib bormoqda. Bu haqda Air Marakanda bosh direktorining aloqalar bo‘yicha o‘rinbosari Mariya Sharavinaga tayanib, “RIA Novosti” xabar berdi.
Qayd etilishicha, hozirda Samarqanddan Yevropaga reyslar yo‘q. Kompaniya Yevropaning yirik aviakompaniyalari bilan Yevropa davlatlaridan Samarqandga reyslar ochish bo‘yicha muzokaralar olib bormoqda.
Bundan tashqari, yaqin kelajakda Air Samarkand Yevropa yo‘nalishlari hamda Yaqin Sharq va Janubi-Sharqiy Osiyo mamlakatlariga yo‘nalishlarni qamrab olishni rejalashtirgan.
Sharavina yil boshidan buyon aeroport Rossiya shaharlariga ham parvozlar dasturini sezilarli darajada oshirgani, xususan, Qozon, Ufa, Sochi, Samara, Mineralnie Vodiga to‘g‘ridan to‘g‘ri reyslar ochilgani, Sankt-Peterburg, Novosibirsk, Moskvaga parvozlar chastotasi ko‘paytirilganini qo‘shimcha qilgan.
Shuningdek, 21-aprel kuni Rossiyaning “Pobeda” loukosteri Moskvadan ilk parvozini amalga oshirgan, u Samarqandga haftasiga ikki marta parvoz qilishni rejalashtirmoqda.
Samarqand xalqaro aeroporti
2022-yil 18-mart kuni aeroport majmuasining tantanali ochilish marosimi bo‘lib o‘tgan edi. Yangi terminal qurish loyihasi Air Marakanda va davlat hamkori Uzbekistan Airports o‘rtasida O‘zbekiston aviatsiya tarixidagi birinchi davlat-xususiy sheriklik kelishuvi doirasida amalga oshirildi.
Yangi terminal rejalashtirilgan reyslar sonini haftasiga 40 tadan 120 tagacha oshirish imkonini beradi, perronning modernizatsiya qilinishi esa samolyot qo‘nish joylari sonini 24 taga yetkazdi. Uzbekistan Airports boshqaruv kengashi raisi Ra’no Jo‘rayevaga ko‘ra, Samarqand xalqaro aeroporti loyihasi 150 million dollarga tushgan.
Izoh (0)