24 апрель куни Silk Avia авиакомпанияси Тошкент—Самарқанд—Тошкент йўналиши бўйича АТР 72-600 самолёти бортида ўзининг илк кўргазмали парвозини амалга оширди, деб хабар бермоқда “Дарё” мухбири.
.jpg)
Йўловчилар иштирокидаги биринчи рейсдан аввал авиакомпаниянинг очилиш маросими бўлиб ўтди. Маҳаллий авиақатновлар терминалида бўлиб ўтган маросимни Uzbekistan Airports акциядорлик жамияти бошқаруви раиси Раъно Жўраева очиб берди.
“Минтақавий авиакомпания Ўзбекистонда нафақат аэропортлар тармоғини ривожлантириш, балки туризмни ривожлантириш ва ишбилармонлик фаоллигини рағбатлантириш бўйича катта механизмнинг асосий қисми ҳисобланади. Бу улкан механизмни ҳаракатланишига имкон берувчи муҳим кичик тафсилот. У ҳудудларни бир-бирига боғлаш, йўловчиларни А нуқтадан Б нуқтага ўз вақтида, тез ва арзон етказиб бериш функцияларини ўз зиммасига олади. Буни, масалан, Тошкентдан Урганчга учиб, йўлда Самарқанд ёки Бухорода тўхтаб, йўловчиларни қолдириб, олиб кетувчи ҳаво таксиси деб аташ мумкин. Биз Ўзбекистонни боғловчи авиакомпанияни яратдик, бу билан масофалар қисқаради, одамлар эса яқинроқ бўлади”, — деди Uzbekistan Airports раҳбари.
Очилиш маросимида Ўзбекистон табиий ресурслари вазири Азиз Абдуҳакимов ва Ўзбекистон транспорт вазири ўринбосари Жасур Чориев ҳам иштирок этди. Маросимдан сўнг меҳмонлар ва оммавий ахборот воситалари вакиллари Тошкент—Самарқанд йўналиши бўйича УС-131 кўргазмали рейсига йўл олди.
Самарқандга етиб келган самолёт анъанавий тарзда сув аркаси билан кутиб олинди. Самарқанддаги тадбирдан сўнг рейс йўловчилари УС-132 рейси билан Тошкентга жўнаб кетди.
Маълумот учун, 20 апрель куни Silk Avia ҳаво оператори сертификатини олган ва тўрт кун давомида АТР инструкторлари томонидан авиакомпания экипажларини ишга тушириш учун техник парвозларни амалга оширган. 25 апрелдан бошлаб авиакомпания мувофиқ мунтазам қатновларни бошлади.
Изоҳ (0)