AQSH Milliy xavfsizlik kengashining strategik aloqalar bo‘yicha koordinatori Jon Kirbining aytishicha, Rossiya ob-havo yaxshilanganidan keyin frontning bir qancha sektorlarida Ukrainaga qarshi yangi hujum boshlashi mumkin. Uning so‘zlariga ko‘ra, AQSH Ukraina Qurolli kuchlari qarshi hujumga o‘tish imkoniyatiga ega bo‘lishi uchun Ukrainaning mudofaa qobiliyatini har tomonlama kuchaytirmoqda. Bu haqda Kirbi “Amerika Ovozi”ga bergan intervyusida ma’lum qildi.
Ukraina armiyasining shoshilinch ehtiyojlari orasida Kirbi zirhli texnika, artilleriya, havo hujumidan mudofaa, logistika vositalarini sanadi.
“Qanday qilib uni (Ukraina armiyasini) jangda saqlab turish, uni qanday qo‘llab-quvvatlash, ehtiyot qismlar, oziq-ovqat, suv va yonilg‘i, uzluksiz ishlash uchun zarur bo‘lgan narsalarni qanday olish — bular ustuvor yo‘nalishlardan bo‘lishi kerak”, — dedi AQSH rasmiysi.
Ukraina hukumati qarshi hujum “yaqin kelajakda amalga oshirilishini” aytdi.
Pentagonning maxfiy hujjatlari internetga oshkor qilingandan so‘ng, The Washington Post nashri AQSH Kiyevning qarshi hujumdagi maqsadlarga erishishiga shubha bilan qarayotgani haqida yozgandi.
AQSH razvedkasining fikricha, Ukrainadagi qo‘shinlarni bir joyga to‘plash bilan bog‘liq muammolar, shuningdek, o‘q-dori va jihozlarning yetishmasligi sabab Ukraina Qurolli kuchlarining qarshi hujumi Kiyevning umidlarini oqlamasligi mumkin.
WP’ning AQSH rasmiylari orasidagi suhbatdoshlari qo‘shimcha qilishicha, bunday prognozlarga Milliy razvedka kengashining bahosi ham mos kelmoqda — unga ko‘ra, Ukraina bu safar kuzgi hujumda qaytarib olgan hududichalik ko‘p yerlarini qaytarib olishi dargumon.
Jon Kirbi “Amerika Ovozi”ga bergan intervyusida Ukrainaning NATOga kirishi shartini ham ma’lum qilgan. Unga ko‘ra, AQSH Ukrainaning Shimoliy Atlantika alyansiga qo‘shilishini yoqlaydi, faqat Kiyev Rossiya bilan urushda g‘alaba qozonganidan keyin.
Izoh (0)