AQSH Ukrainaning Shimoliy Atlantika alyansiga qo‘shilishini yoqlaydi, faqat Kiyev Rossiya bilan urushda g‘alaba qozonganidan keyin. Bu haqda AQSH Milliy xavfsizlik kengashining strategik kommunikatsiyalar bo‘yicha koordinatori Jon Kirbi “Amerika Ovozi” radiosiga bergan intervyusida ma’lum qildi.
Kirbining so‘zlariga ko‘ra, Ukraina uchun NATO eshiklari ochiqligicha qolmoqda.
“Bu borada hech narsa o‘zgarmagan. Biz NATOning ochiq eshiklar siyosatini saqlashda davom etamiz. Lekin alyansga qo‘shilish haqidagi har qanday muhokamalar ushbu mamlakat va NATOning o‘zi o‘rtasidagi suhbat bo‘lishi lozimligini ham aytganmiz”, — dedi Kirbi.
Uning ta’kidlashicha, bugungi kunda alyans uchun asosiy masala Kiyevni rus bosqinchilariga qarshi kurashda qo‘llab-quvvatlashdir.
“Hozir asosiy e’tibor Ukrainaga jang maydonida g‘alaba qozonishiga yordam berishga qaratilishi kerak, shundagina ular muzokaralar stolida ham zafar qozonishi mumkin. Biz hozir shu narsaga e’tibor qaratmoqdamiz”, — dedi Oq uy matbuot kotibi.
Iyul oyida Vilnyusda NATO sammiti bo‘lib o‘tadi. Alyansning ko‘plab aʼzolari ushbu yig‘ilishda Ukrainaga NATOga qo‘shilish bo‘yicha “yo‘l xaritasi”ni taqdim etish tarafdori. Shu bilan birga AQSH, Germaniya va Vengriya bunga qarshi ekanini bildirgan.
Izoh (0)