AQSH Davlat kotibi Entoni Blinken 24-aprel kuni kechqurun Sudandagi urushayotgan tomonlar mahalliy vaqt bilan yarim tunda boshlanadigan uch kunlik sulhga kelishib olganini e’lon qildi. Bu o‘n kunlik janglar davomida uchinchi marta sulh e’lon qilinishi, bundan avval ikkitasi barbod bo‘lgan.
Blinkenning BBC jurnalistiga aytishicha, Sudandagi munatazam armiya va harbiylashtirilgan “Tezkor harakat kuchlari” bilan o‘t ochishni to‘xtatish kelishuviga 48 soatlik muzokaralardan so‘ng erishilgan. Reuters agentligining tushuntirishicha, AQSH va Saudiya Arabistoni muzokaralarda vositachi bo‘lgan.
“Tezkor harakat kuchlari” Blinkenning so‘zlarini o‘t ochishni to‘liq to‘xtatishga tayyorligi haqidagi bayonot bilan tasdiqladi.
Sudan muntazam armiyasi esa, Blinken sulh boshlanganini e’lon qilganidan ikki soat o‘tib, Facebook orqali sulhga rioya qilish niyatida ekanini e’lon qildi.
Sudanda ikki harbiy tuzilma o‘rtasidagi janglar 15-aprel kuni boshlangan, unda kamida 400 kishi halok bo‘lgan. Janglar tufayli Sudan poytaxti Xartumdagi aholi oziq-ovqat va suvsiz qoldi, ular uydan chiqa olmayapti. Ba’zi joylarda suv ta’minoti buzilgan, ko‘plab xartumliklarning suv uchun Nil daryosiga borishdan boshqa chorasi qolmayapti.
Sulhga rioya qilinsa, tinch aholiga shaharni tark etish imkoni beriladi. Bundan tashqari, xorijiy davlatlar o‘z fuqarolarini Sudandan evakuatsiya qila olishga umid qilmoqda.
Xartum va Sudanda umuman yoki deyarli internet aloqasi yo‘q: tarmoq monitoringi guruhi NetBlocks ma’lumotlariga ko‘ra, butun mamlakat bo‘yicha hozirda internetdan foydalanish 2 foizni tashkil etadi, Xartumda yakshanba oqshomida internet butunlay o‘chib qolgan.
Izoh (0)