Oxirgi olti oy ichida Eron Rossiyaga 300 mingga yaqin artilleriya snaryadlari va millionta o‘q-dori yuborgan, deb yozmoqda The Wall Street Journal Yaqin Sharqdagi manbalariga tayanib.
Nashrning yozishicha, qurol-aslahalar Rossiya kemalari tomonidan Kaspiy dengizi orqali yetkazib berilmoqda. Jurnalistlarga ma’lum bo‘lgan oxirgi partiya 2023-yil mart oyi boshida Eronni tark etgan. Gazeta manbalariga ko‘ra, o‘shanda Rossiyaning “Rasul Gamzatov” yuk kemasi bortida ikki mingga yaqin artilleriya o‘qlari bor edi.
Gazetaning qayd etishicha, yuklar Astraxan portida tushirilgandan so‘ng kema Eronga qaytgan, shundan so‘ng mart oyi oxirida yana Rossiyaga jo‘nab ketgan.
Eron Rossiyaga yashirincha o‘q-dorilar yetkazib bergani haqida avvalroq Sky News telekanali xabar bergandi. Unga ko‘ra, 2023-yil yanvar oyida “Musa Jalil” va “Begey” yuk kemalari Eron portidan Rossiyaga qurol ortilgan 200 ga yaqin transport konteynerlarini olib ketgan. Sky News manbasiga ko‘ra, bu ta’minot ichida 100 millionta patron, 300 mingga yaqin snaryadlar, granatalar, minomyot va pulemyotlar, shuningdek, 10 mingga yaqin zirhli nimcha va dubulg‘alar bo‘lgan. Jurnalistlar bilan suhbatlashgan ekspertlar bu ko‘rsatkichlarni juda yuqori, deb baholadi.
2022-yil kuzida Eron Rossiyaga “Fateh-110” va “Zulfiqor” ballistik raketalarini yetkazib bermoqchi ekani maʼlum bo‘lgandi. Mart oyi boshida Financial Times gazetasi Rossiyaning keyin AQSH Ukrainaga uzoq masofaga uchuvchi ATACMS raketalarini yetkazib bera boshlashidan qo‘rqib, Erondan haligacha ballistik raketa sotib olmayotgani haqida yozdi.
Izoh (0)