“Arsenal” bosh murabbiyi Mikel Arteta jamoasi bilan Angliya Premyer Ligasi 2022/23-yilgi mavsumida g‘olib chiqsa, musobaqani yutgan eng yosh murabbiyga aylanadi. Ispaniyalik mutaxassis ayni vaqtda 41 yoshda.
“Kanonirlar”ning so‘nggi o‘yinlari va natijalaridan keyin bu ssenariy amalga oshishiga ishonch kamayib bormoqda. Lekin hali Artetada rekord o‘rnatish uchun imkon bor.
Ayni vaqtdagi rekord Joze Mourinyoga tegishli. Portugaliyalik murabbiy 2004/05-yilgi mavsumda “Chelsi” bilan APLda g‘olib chiqqanda 42 yosh-u 94 kunlik bo‘lgan.
APLda g‘olib bo‘lgan eng keksa murabbiy esa Aleks Fergyuson hisoblanadi. Mutaxassis “Manchester Yunayted” bilan so‘nggi marta Angliya chempionligini qo‘lga kiritganda 71 yosh-u 112 kunlik bo‘lgan. Fergyuson ilk chempionligini 51 yosh-u 122 kunlik bo‘lganida nishonlagan.
Quyida Angliya Premyer Ligasida g‘olib bo‘lgan eng yosh murabbiylar haqida so‘z boradi.
Joze Mourinyo (42 yosh-u 94 kunlik) — “Chelsi” (2004/05)
Joze Mourinyo Angliyaga kelishi bilan o‘zini “Benazir” (Special One) deb atadi. Bungacha murabbiy “Portu” bilan muvaffaqiyatli mavsum o‘tkazgandi. O‘zining birinchi mavsumidayoq APL chempionligini qo‘lga kiritgan eng yosh murabbiyga aylandi.
“Chelsi” mavsum davomida faqat 1 marta mag‘lub bo‘ldi va turnir jadvalida 2-o‘rindagi “Arsenal”ni 12 ochkoga ortda qoldirdi. Mourinyoning himoyaviy uslubi mavsum davomida to‘liq ishladi va jamoa 38 o‘yinda 15 ta gol o‘tkazib yubordi.
Joze Mourinyo (43 yosh-u 93 kunlik) — “Chelsi” (2005/06)
Mourinyo muvaffaqiyatli yurishini ikkinchi mavsumida ham davom ettirdi va yana chempionga aylandi. Bu portugaliyalik murabbiyning cho‘qqisi edi. London klubi “Lion” futbolchisi Maykl Essiyenni, “Manchester Siti”dan Shon Rayt-Fillipsni o‘z safiga qo‘shib oldi. Jamoa nafaqat Premyer Ligani balki Chempionlar Ligasini ham yutishni xohlayotgandi. Ammo “Chelsi” pley-offning birinchi bosqichidayoq “Barselona”ga mag‘lub bo‘lib, musobaqani tark etdi.
“Aristokratlar” APLda 4 marta durang o‘ynadi va 5 marta mag‘lub bo‘ldi. Shunga qaramay “Chelsi” ikkinchi o‘rindagi “Manchester Yunayted”ni 8 ochkoga ortda qoldirib, chempionga aylangandi.
Kenni Dalglish (44 yosh-u 71 kunlik) — “Blekbern” (1994/95)
Ushbu mavsumda chempionlik taqdiri so‘nggi turda hal qilingan. Dalglishning “Blekbern”i oxirgi turda “Enfild”da “Liverpul” mehmoni bo‘lishi kerak edi. Chempionlik uchun kurashayotgan “Manchester Yunayted” esa “Vest Hem” maydoniga safar qilishi kerak edi. “Blekbern” g‘alaba qozonsa, “qizil iblislar” qanday natija qayd etsa ham chempionga aylanardi. Biroq Dalglish shogirdlari 1:2 hisobida mag‘lub bo‘ldi.
Ammo “Manchester Yunayted” “Vest Hem”ni mag‘lub eta olmadi va “Blekbern” Angliya chempioniga aylandi. Dalglish shogirdlari 89 ochko to‘plab, Manchester klubini 1 ochkoga ortda qoldirdi.
Pep Gvardiola (47 yosh-u 86 kunlik) — “Manchester Siti” (2017/18)
Ispaniyalik murabbiy Angliyaga “Barselona” va “Bavariya”da o‘tkazgan 6 muvaffaqiyatli mavsumidan so‘ng kelgan. Pep allaqachon 3 martadan La Liga va Bundesliga, shuningdek, 2 marta Chempionlar Ligasi g‘olibi bo‘lgandi.
“Manchester Siti” 2017/18-yilgi mavsumda ikkinchi o‘rindagi “Manchester Yunayted”ni 19 ochkoga ortda qoldirgandi.
Roberto Manchini (47 yosh-u 167 kunlik) — “Manchester Siti” (2011/12)
Roberto Manchini “Manchester Siti”ga 2009-yilning dekabrda Mark Hyuz iste’foga chiqarilganidan keyin kelgan. Italiyalik murabbiy dastlabki 2 mavsumida uchinchi va beshinchi o‘rinlarni egalladi. Manchini uchinchi mavsumiga kelibgina g‘alaba formulasini topa oldi.
“Manchester Siti” APL chempionligini musobaqaning so‘nggi turida chempionatda jon saqlab qolish uchun kurashayotgan “Kuinz Park Renjers”ga qarshi o‘yinda qo‘lga kiritgandi. “Manchester Yunayted” o‘z o‘yinida g‘alaba qozongandi va agar “shaharliklar” ochko yo‘qotsa chempionlikni boy berardi. “KPR”ga 1:2 hisobida mag‘lub bo‘layotgan “Manchester Siti” asosiy vaqtga qo‘shib berilgan daqiqalarda ikkita gol urib, g‘alabani, jumladan, chempionlikni ilib ketgandi.
Antonio Konte (47 yosh-u 285 kunlik) — “Chelsi” (2016/17)
Antonio Konte Angliyaga Italiyada “Yuventus” bilan 3 karra A Seriya chempioni bo‘lganidan so‘ng kelgandi. Mutaxassis “Chelsi” bilan Angliya chempioni bo‘ldi va Angliya Kubogini qo‘lga kiritdi.
“Chelsi” aprel oyida “Kristal Pelas” va “Manchester Yunayted”ga mag‘lub bo‘ldi. Biroq mavsumni qatorasiga 6 ta o‘yinda g‘alaba qozonib yakunladi. Konte jamoasi ikkinchi o‘rindagi “Tottenhem”ni 7 ochkoga ortda qoldirgandi.
Pep Gvardiola (48 yosh-u 113 kunlik) — “Manchester Siti” (2018/19)
Ispaniyalik murabbiyning Angliya Premyer Ligasidagi ikkinchi chempionligi osonlikcha qo‘lga kiritilmagan. “Liverpul” “Manchester Siti”ni so‘nggi turgacha ta’qib qilgan. So‘nggi turdan oldin ham jamoalar orasidagi farq 1 ochkoni tashkil qilardi. Gvardiola jamoasi oxirgi turda mehmonda “Brayton”ni mag‘lub etgan va chempionlikni nishonlagan.
Arsen Venger (48 yosh-u 193 kunlik) — “Arsenal” (1997/98)
Arsen Venger “Arsenal” murabbiyiga aylanganidan keyingi ikkinchi mavsumida jamoani chempionlik sari yetaklagan. Bu APL tarixidagi eng uzoq boshqaruvlardan birining boshlanishi edi. Venger London klubi bilan 2 marta titul yutdi, biroq klubni xalqaro maydonda va ichki chempionatda raqobatbardosh jamoaga aylantirdi.
Pep Gvardiola (50 yosh-u 112 kunlik) — “Manchester Siti” (2020/21)
Gvardiola 50 yoshida faoliyati davomidagi to‘qqizinchi, “Manchester Siti” murabbiyi sifatidagi uchinchi titulini qo‘lga kiritgan. “Shaharliklar” 86 ochko to‘plab eng yaqin ta’qibchisi “Manchester Yunayted”ni 8 ochkoga ortda qoldirgan. O‘sha mavsumda Gvardiola shogirdlari 27 ta o‘yinda g‘alaba qozongandi.
Karlo Anchelotti (50 yosh-u 333 kunlik) — “Chelsi” (2009/10)
Karlo Anchelotti Angliyaga Italiyada “Parma”, “Yuventus” va “Milan”dagi faoliyatidan keyin kelgan. Italiyalik mutaxassis “Chelsi”dagi birinchi mavsumidayoq muvaffaqiyat qozondi. “Aristokratlar” Anchelottining Italiyadan tashqarida boshqargan birinchi jamoasi edi. Shuningdek, bu “Chelsi” uchun Mourinyoning dublidan keyin Premyer Ligadagi uchinchi titul edi.
Angliya Premyer Ligasining 2022/23-yilgi mavsumi taqdiri katta ehtimol bilan so‘nggi turda hal bo‘ladi. 28-may kuni “Arsenal” “Vulverhempton”ga qarshi maydonga tushadi. U vaqtda Arteta 41 yosh-u 62 kunlik bo‘ladi. Ispaniyalik mutaxassis Joze Mourinyodan 397 kunlik kichik vaqtida musobaqa chempionligini qo‘lga kiritishi mumkin.
Biroq oxirgi turlardagi ketma-ket uchta durangdan keyin ispaniyalik mutaxassis o‘zi va jamoasini qiyi ahvolga solib qo‘ydi. Ikkita zaxira o‘yiniga ega “Manchester Siti” “Arsenal”dan 5 ochko ortda qolmoqda. 26-aprel oqshomida bo‘lib o‘tadigan o‘zaro o‘yin ham ko‘p masalaga oydinlik kiritadi.
Izoh (0)