Пекин барча мамлакатларнинг суверен мақомини ҳурмат қилади, деди Хитой Ташқи ишлар вазирлиги матбуот котиби Мао Нин. Вазирлик Хитойнинг Франциядаги элчиси Лу Шайнинг Қримни “аслида Россияники” деб атаган ва собиқ Совет давлатларининг суверенитетига шубҳа билдирган интервьюсига шундай изоҳ берди.
“Тегишли масала бўйича Хитойнинг позицияси ўзгармаган. Ҳудудий суверенитетга келсак, Хитойнинг позицияси доимо аниқ бўлиб келган. Хитой барча мамлакатларнинг суверенитети, мустақиллиги ва ҳудудий яхлитлигини ҳурмат қилади ҳамда Бирлашган Миллатлар Ташкилоти низомининг мақсад ва тамойилларини қўллаб-қувватлайди”, — деди ТИВ вакили.
Гап хитойлик дипломатнинг Франциянинг LCI каналига берган интервьюси ҳақида кетмоқда. Унда Лу Шай Қрим яриморолини тарихий жиҳатдан Россияники деб атаган. Бундан ташқари, дипломатнинг сўзларига кўра, собиқ Совет Иттифоқи давлатлари гўёки амалдаги халқаро ҳуқуқда ҳеч қандай самарали мақомга эга эмас, чунки “бирорта ҳам халқаро шартномада уларнинг суверен давлат сифатидаги мақоми белгилаб қўйилмаган”.
Хитой элчисининг сўзлари Латвия, Литва, Эстония ва Украина расмийларининг кескин муносабатига сабаб бўлди. Франция Ташқи ишлар вазирлиги Лу Шайнинг сўзларини “хавотир билан эътиборга олганини” билдирди ва Хитой расмийларидан бу гаплар Пекиннинг позициясини акс эттирадими ёки йўқлигига аниқлик киритишни сўради.
Bloomberg нашрининг қайд этишича, Хитойнинг Франциядаги элчихонаси ўзининг WeChat аккаунтида элчи билан суҳбат стенограммасини ўчириб ташлаган. Суҳбат элчихонанинг расмий сайтида чоп этилмаган.
Изоҳ (0)