Xitoy elchisi sobiq SSSR davlatlari suvereniteti va Qrim statusiga shubha bildirdi (video)

Xitoyning Fransiyadagi elchisi Lu Shay Qrim yarimorolini tarixiy jihatdan Rossiyaniki deb atadi va Sovet Ittifoqi parchalanganidan keyin tashkil topgan mustaqil davlatlar go‘yoki dunyoda qonuniy mustahkamlangan maqomga ega emasligini aytdi. Tegishli bayonot Fransiyaning  La Chaîne Info telekanalida efirga uzatildi.

Xitoy elchisi Qrimni Ukrainaniki deb hisoblaysizmi, degan savolga shunday javob berdi: 

“Bu muammoni qanday qabul qilishingizga bog‘liq. Tarix mavjud. Qrim dastlab Rossiyaniki bo‘lgan, shunday emasmi? Sovet davrida Nikita Xrushchyov Qrimni Ukrainaga bergan”.

Jurnalistning ta’kidlashicha, bu masala hech narsaga bog‘liq emas, chunki xalqaro huquq yarimorol Ukrainaga tegishli ekanini belgilaydi. Biroq Lu Shay bu pozitsiyani rad etgan.

Diplomatning so‘zlariga ko‘ra, sobiq Sovet Ittifoqi davlatlari go‘yoki amaldagi xalqaro huquqda hech qanday samarali maqomga ega emas, chunki “birorta ham xalqaro shartnomada ularning suveren davlat sifatidagi maqomi belgilab qo‘yilgani yo‘q”.

Siyosatchi jurnalistdan postsovet chegaralari masalasida “bahs yuritishni” to‘xtatishga chaqirgan. 

Intervyu e’lon qilingandan so‘ng, Estoniya tashqi ishlar vaziri Margus Tsaxkna XXRning Fransiyadagi elchisining bunday bayonotlari tushunarsiz ekanini aytdi. Estoniya TIV Xitoyning Tallindagi elchisini chaqirish niyatida. 

“Bizning maqsadimiz —  bunday qarashlar qabul qilinib bo‘lmasligini va Estoniya suveren davlat ekanini tushuntirish”, — degan Tsaxkna.

Litva tashqi ishlar vaziri Gabrielyus Landsbergisning aytishicha, Lu Shayning bayonoti “Boltiqbo‘yi mamlakatlari Xitoyning Ukrainada tinchlikka vositachilik qilishiga ishonmasligi sabablaridan biridir”.

Latviya tashqi ishlar vaziri Edgar Rinkevich elchining so‘zlarini “mutlaqo qabul qilib bo‘lmasligini” bildirdi. 

“Biz Xitoy tomonidan tegishli tushuntirishni va bayonotning to‘liq rad etilishini kutmoqdamiz”, — degan Rinkevich.

Ukrainaning Fransiyadagi elchisi Vadim Omelchenko, XXR elchisida yo “geografiya bilan bog‘liq aniq muammolar borligi” yoki uning bayonoti rasmiy Pekinning “Ukrainada xalqaro huquq va BMT nizomi tamoyillari asosida tinchlik o‘rnatishga qaratilgan sa’y-harakatlari haqidagi pozitsiyasiga zid ekanini” aytdi.

Fransiya Tashqi ishlar vazirligi Xitoy elchisining bayonotidan “xavotirga tushganini” bildirib, Pekinni o‘z pozitsiyasini aniqlashtirishga chaqirdi.