Polsha hukumati Rossiya va Belarus bilan chegaralarda mudofaa to‘siqlarini o‘rnatishga qaror qildi. Bu haqda Polsha mudofaa vaziri Mariush Blashak Twitter’da xabar berdi.
“Rossiya va Belarus bilan chegarada xavfsizlik choralarini profilaktik kengaytirishni boshladik. Bu mudofaa va oldini olish strategiyamizning bir qismi. Dastlabki istehkomlar Kaliningrad viloyati bilan chegarada qurilmoqda”, — dedi Blashak.
U Polsha—Rossiya va Polsha—Belarus chegaralarida nazorat-o‘tkazish punktlari yaqinidagi yo‘lda metall va betondan yasalgan tankka qarshi to‘siqlarning bir nechta fotosuratlarni e’lon qildi.
2021-yilda Polsha migratsiya inqirozi tufayli Belarus bilan chegarada devor qurishni boshlagandi. Devor qurilib bitkazilgani haqida 2022-yilning kuzida e’lon qilindi.
2022-yil fevral oyida Polsha mudofaa vaziri o‘rinbosari Voytsex Skurkyevich Rossiya bilan chegarada ham devor qurilishi haqida ma’lum qilgandi. Kaliningrad viloyati hukumati matbuot xizmati rahbari Dmitriy Liskovning aytishicha, gap devor emas, balki to‘siq haqida ketmoqda.
Izoh (0)