Польша яқин икки йил ичида кучли армия яратишни режалаштирмоқда. Бу ҳақда Польша бош вазири ўринбосари ва мудофаа вазири Мариуш Блашак маълум қилди. Бундай ваъда сайлов кампанияси доирасида берилди — Польшада шу йилнинг кузида парламент сайловлари бўлиб ўтади.
Блашакнинг айтишича, ҳукмрон миллий-консерватив “Қонун ва адолат” партияси ғалаба қозонса, “икки йилдан сўнг Польша армияси Европада қуруқликдаги энг кучли армияга айланади”.
Варшавада консерваторлар бошчилигидаги ҳукумат Украинанинг энг кучли сиёсий ва ҳарбий тарафдорларидан бири ҳисобланади. Шу билан бирга, Польша Россия ҳужумига учраган қўшни давлатни танклар, МиГ-29 қирувчи самолётлари ва бошқа турдаги қуроллар билан таъминлабгина қолмай, ўз армиясини ҳам фаол равишда қуроллантирмоқда.
Аввалроқ Польша президенти Анжей Дуда мамлакат Жанубий Кореядан FА-50 ва АҚШдан F-35 самолётларини олаётгани муносабати билан ўзининг барча МиГ-29 қирувчиларини Украинага топшириши ҳақида эълон қилганди.
Апрель бошида Дуда Польша аллақачон саккизта МиГ-29 қирувчисини Киевга етказиб берганини ва шу турдаги олтита қирувчини топширишга тайёрланаётганини айтган.
Изоҳ (0)