“Barselona” La Liga 30-turi doirasida kechgan “Atletiko”ga qarshi o‘yinda 1:0 hisobida g‘alaba qozondi.
Top-7 ligalar orasida tarixiy rekord
Ortda qolgan 30 tur davomida katalonlar bor-yo‘g‘i 9 marta o‘z darvozasidan to‘p olib chiqdi. Bu Yevropa top-7 lik (Angliya, Ispaniya, Germaniya, Italiya, Fransiya, Portugaliya va Niderlandiya) ligalari tarixidagi eng yaxshi ko‘rsatkich.
Avvalgi rekord “Portu”ga tegishli bo‘lib, portugal klubi 1991/92-yilgi mavsumda 30 ta tur davomida 10 ta gol o‘tkazib yuborgandi. APL 2004/05-yilgi mavsumida “Chelsi” bu ko‘rsatkichni takrorlagan. La Ligada esa eng yaxshi ko‘rsatkich “Atletiko”ga tegishli (14 ta gol).
La Liga joriy mavsumida Mark-Andre ter Shtegen darvozasini ishg‘ol qilgan klublar: “Real Madrid” (4 gol), “Real Sosyedad” (1), “Osasuna” (1), “Espanyol” (1), “Betis” (1) va “Almeriya” (1).
Xavi jamoasi Primera joriy mavsumida 23 ta quruq o‘yin o‘tkazdi. Klub tarixidagi eng yaxshi natija 1986/87-yilgi mavsumda (24 ta quruq o‘yin) qayd etilgan.
Katalonlar chempionat ushbu mavsumida 10 marta 1:0 hisobi bilan g‘alaba qozondi. Bunaqasi “Barselona” tarixida ilk bor kuzatildi. Rekord esa 11 taga teng: “Sevilya” (2020/21), “Atletiko” (2017/18) va “Valensiya” (1988/89). Biroq bu klublarning birortasi yakunda chempionat g‘olibiga aylana olmagan.
Penaltisiz 350 kun, Simeonening qo‘rqinchli tushiga aylangan “Kamp Nou”
“Atletiko”ning La Ligadagi 13 o‘yindan iborat mag‘lubiyatsiz seriyasi yakunlandi. Oxirgi marta madridliklar 8-yanvar kuni yutqazgan. O‘shanda ham “Barselona” 0:1 hisobida ustun kelgandi.
Madrid jamoasi qatorasiga uchinchi marta katalonlarga yengildi. So‘nggi bor “matraschilar” 2021-yilning oktabrida g‘alaba qozongandi (2:0).
“Atletiko” La Ligada ketma-ket 350 kundan biri penalti ishlay olmayapti. Jamoa ketma-ket 33 turdan beri 11 metrlik jarima zarbasi tepmayapti. Har ikki ko‘rsatkich ham rekord. Bunga qadar “Atletiko” 1941/42 va 1942/43-yilgi mavsumda ketma-ket 32 ta o‘yinda penalti tepmagandi.
Diyego Simeone “Atletiko” boshqaruvidagi barcha musobaqalar doirasida 16-marta “Kamp Nou”da g‘alaba qozona olmadi. Mutaxassis hech qaysi stadionda bu qadar yomon ko‘rsatkich qayd etmagan.
Levandovskida 7 yillik antirekord
Katalonlar hujumchisi Robert Levandovski so‘nggi 10 ta o‘yinning 9 tasida gol ura olmadi. Bu polshalik futbolchi uchun 2016-yilning bahoridan keyingi eng yomon ko‘rsatkich. O‘shanda ham Levandovski “Bavariya” va Polsha safidagi ketma-ket o‘nta o‘yinning faqat bittasida gol urgandi.
“Barselona” darvozaboni ter Shtegen La Liga joriy mavsumida “Kamp Nou”da 15 ta o‘yin o‘tkazdi. Ularning 13 tasida o‘z darvozasi daxlsizligini saqlab qoldi va ikkita gol o‘tkazib yubordi.
Izoh (0)