“Manchester Yunayted” yozda tarkibda “katta tozalash” amalga oshirmoqchi

“Manchester Yunayted” yozgi transfer oynasida qator futbolchilari bilan xayrlashmoqchi.

The Telegraph nashrining xabar qilishicha, jamoa ustozi Erik ten Hag tarkibda jiddiy “tozalash” ishlarini olib bormoqchi.15 nafar futbolchining klubdagi kelajagi so‘roq ostida turibdi. Murabbiy qator futbolchilar borasida yakuniy xulosasini qabul qilgan.

Jamoani tark etishi mumkin bo‘lganlar orasida Harri Maguayr, Viktor Lindelyof va Antoni Marsyal kabi mashhur nomlar bor. Klub ularning yuqori maoshi sabab hamkorlikni davom ettirmoqchi emas.

Bundan tashqari Aaron Uan-Bissaka, Fred, Donni van de Bek kabi futbolchilarning ham kelajagi mavhum bo‘lib qolmoqda.

Ijarada bo‘lgan Erik Bayi va Aleks Telles tabiiyki, ten Hagning shartlariga mos tushmaydi. Fil Jons va Aksel Tuanzebe esa shartnoma muddati yakunlangani bois klub tark etadi. “Nottingem Forest” safida ijarada o‘ynayotgan Din Henderson ham ketadiganlar safiga qo‘shilishi mumkin.

Entoni Elanga va Brendon Uilyams ham niderlandiyalik mutaxassis jamoasida muhim rolga ega emas va ular ham klubni tark etishi mumkin. Shuningdek, muntazam o‘yin amaliyotiga ega bo‘layotgan Skott Maktominey ham yozda o‘z jamoasini almashtirishi mumkin.

“Manchester Yunayted” APL 30 ta turidan keyin 59 ochko bilan 3-o‘rinda bormoqda.