Rossiya prezidenti matbuot kotibi Dmitriy Peskovning o‘g‘li Nikolay “Vagner” xususiy harbiy kompaniyasi tarkibida urush zonasida xizmat qilganini tasdiqladi. Bu haqda “Komsomolskaya pravda” xabar berdi.
“Vagner” asoschisi Yevgeniy Prigojin avvalroq Nikolay Peskovning urush zonasidagi ishtiroki haqida gapirgandi. Nikolay “harbiy amaliyotda” qatnashish qarorini “o‘z burchi” deb bilishi va “chetda o‘tira olmasligi” bilan izohladi. U oilasi, shu jumladan, otasi ham buni qo‘llab-quvvatlaganini aytdi.
“Maxsus harbiy operatsiyada qatnashishga qaror qilganimda, u yerga qanday borishni bilmasdim. Shunday qilib, otamga murojaat qilishimga to‘g‘ri keldi. Undan ’Vagner’ bilan qanday qilib to‘g‘ri bog‘lanishimni so‘radim. Otam menga bu borada yordam berdi”, — dedi u.
Uning so‘zlariga ko‘ra, xizmat paytida “ma’lum bir harbiy jasorati uchun” u “Jasorat uchun” medalini olgan.
21-aprel kuni “Vagner” asoschisi Yevgeniy Prigojin Dmitriy Peskovning o‘g‘li xususiy harbiy kampaniya safiga qo‘shilganini va artilleriyachi sifatida Ukrainadagi urush zonasiga ketganini ma’lum qilgan.
Uning so‘zlariga ko‘ra, prezident matbuot kotibi o‘g‘lining hamkasblari uning otasi kimligini bilmagan. Nikolay “Vagner”ga boshqa ism va familiya bilan “soxta hujjatlar” asosida qo‘shilgan. Prigojin Nikolayni “Vagner” safiga olishni Dmitriy Peskov so‘raganini aytgan.
Hozirda Peskovning o‘g‘li ta’tilda, urush zonasidan kelganini Nikolayning o‘zi tasdiqlagan.
Izoh (0)