Хитойнинг Франциядаги элчиси Лу Шай Қрим яриморолини тарихий жиҳатдан Россияники деб атади ва Совет Иттифоқи парчаланганидан кейин ташкил топган мустақил давлатлар гўёки дунёда қонуний мустаҳкамланган мақомга эга эмаслигини айтди. Тегишли баёнот Франциянинг Lа Chаînе Info телеканалида эфирга узатилди.
Хитой элчиси Қримни Украинаники деб ҳисоблайсизми, деган саволга шундай жавоб берди:
“Бу муаммони қандай қабул қилишингизга боғлиқ. Тарих мавжуд. Қрим дастлаб Россияники бўлган, шундай эмасми? Совет даврида Никита Хрушчёв Қримни Украинага берган”.
Журналистнинг таъкидлашича, бу масала ҳеч нарсага боғлиқ эмас, чунки халқаро ҳуқуқ яриморол Украинага тегишли эканини белгилайди. Бироқ Лу Шай бу позицияни рад этган.
Дипломатнинг сўзларига кўра, собиқ Совет Иттифоқи давлатлари гўёки амалдаги халқаро ҳуқуқда ҳеч қандай самарали мақомга эга эмас, чунки “бирорта ҳам халқаро шартномада уларнинг суверен давлат сифатидаги мақоми белгилаб қўйилгани йўқ”.
Сиёсатчи журналистдан посцовет чегаралари масаласида “баҳс юритишни” тўхтатишга чақирган.
Интервью эълон қилингандан сўнг, Эстония ташқи ишлар вазири Маргус Цахкна ХХРнинг Франциядаги элчисининг бундай баёнотлари тушунарсиз эканини айтди. Эстония ТИВ Хитойнинг Таллиндаги элчисини чақириш ниятида.
“Бизнинг мақсадимиз — бундай қарашлар қабул қилиниб бўлмаслигини ва Эстония суверен давлат эканини тушунтириш”, — деган Цахкна.
Литва ташқи ишлар вазири Габриэлюс Ландсбергиснинг айтишича, Лу Шайнинг баёноти “Болтиқбўйи мамлакатлари Хитойнинг Украинада тинчликка воситачилик қилишига ишонмаслиги сабабларидан биридир”.
Латвия ташқи ишлар вазири Эдгар Ринкевич элчининг сўзларини “мутлақо қабул қилиб бўлмаслигини” билдирди.
“Биз Хитой томонидан тегишли тушунтиришни ва баёнотнинг тўлиқ рад этилишини кутмоқдамиз”, — деган Ринкевич.
Украинанинг Франциядаги элчиси Вадим Омелченко, ХХР элчисида ё “география билан боғлиқ аниқ муаммолар борлиги” ёки унинг баёноти расмий Пекиннинг “Украинада халқаро ҳуқуқ ва БМТ низоми тамойиллари асосида тинчлик ўрнатишга қаратилган саъй-ҳаракатлари ҳақидаги позициясига зид эканини” айтди.
Франция Ташқи ишлар вазирлиги Хитой элчисининг баёнотидан “хавотирга тушганини” билдириб, Пекинни ўз позициясини аниқлаштиришга чақирди.
Изоҳ (0)