Sudanda bir haftadan buyon davom etayotgan jangovar harakatlarda 400 dan ortiq odam halok bo‘ldi, 3,5 mingdan ortiq kishi jarohatlandi. Bu haqda Jahon sog‘liqni saqlash tashkiloti ma’lumotlariga tayanib, Al-Jazeera telekanali xabar bermoqda.
“413 kishi halok bo‘ldi, 3 551 kishi jarohat oldi”, — degan JSST matbuot kotibi Margaret Xarris brifingda.
Uning so‘zlariga ko‘ra, halok bo‘lganlar orasida bolalar ham bor, shuningdek, kamida 50 nafar bola jarohatlangan.
21-aprel, juma kuni, xususan, poytaxt Xartum va Bahri shahrida to‘qnashuvlar davom etmoqda, deyiladi Al Jazeera xabarida.
Xartumda elektr taʼminotida uzilishlar kuzatilmoqda, ichimlik suvi va oziq-ovqat yetishmaydi, idora va maktablar yopilgan. Elektr yo‘qligi sababli shifoxonalar normal ishlay olmayapti, dori-darmon yetishmayapti.
Ko‘plab mahalliy aholi shaharni shaxsiy mashinalarda yoki piyoda tark etishga harakat qilmoqda. Avtovokzal shahardan avtobusda chiqib ketishni kutayotganlar bilan to‘lib-toshgan. Guvohlarning aytishicha, otishmada o‘lganlarning jasadlari shahar ko‘chalarida yotibdi, ularni hech kim yig‘ib olmayapti, havoni badbo‘y hid tutib ketgan.
Hafta davomida tomonlar sulh bo‘yicha kelishib olganini bir necha bor e’lon qildi, ammo shunga qaramay, jangovar harakatlar davom etmoqda.
Mojaro nima sababdan boshlandi?
Sudanda 15-aprel kuni boshlangan qurolli mojaro mamlakatning amaldagi prezidenti, muntazam armiyani nazorat qiluvchi general Abdul Fattoh al-Burxon va uning o‘rinbosari, “Tezkor harakat kuchlari” qo‘mondoni general Muhammad Hamdan Dagalo o‘rtasidagi munosabatlarning keskinlashishi natijasida yuzaga kelgan.
Ular 2021-yil oktabrda davlat to‘ntarishi natijasida hokimiyatga kelishgandi, ammo asta-sekin davlatni bu yo‘nalishda boshqarish bo‘yicha kelishmovchilikka bordi, fuqarolik boshqaruviga o‘tish taklif qilindi.
Qarama-qarshilikning keskin bosqichi Dagalo 100 mingga yaqin odamni tashkil etuvchi “Tezkor harakat kuchlarini” butun mamlakat bo‘ylab joylashtirganidan keyin boshlandi, al-Burxon buni tahdid sifatida qabul qildi.
Har ikki tomon Xartumdagi muhim obyektlar ustidan nazoratni qo‘lga olganini da’vo qilmoqda, ammo kim nimani nazorat qilayotgani hali noma’lum.
Asosiy janglar shahar markazida joylashgan Xartum aeroporti hududida kechmoqda. U yer va boshqa bir qator joylardan osmonga muntazam qora tutun ko‘tarilmoqda. Ko‘chalarda og‘ir zirhli mashinalar kezib yuribdi.
Izoh (0)