Afg‘onistonda ramazon oyi tugashi va Ramazon hayiti boshlanishi munosabati bilan 2 460 nafar mahkum qamoqxonalardan ozod qilinadi. Tegishli buyruq Afg‘onistonda 2021-yil avgustidan buyon hokimiyatni nazorat qilib kelayotgan “Tolibon” oliy yetakchisi Haybatulloh Oxundzoda tomonidan chiqarilgan. Bu haqda TOLOnews telekanali “Tolibon” Oliy sudi bayonotiga tayanib xabar bermoqda.
“Mo‘minlarning oliy yetakchisi(“Tolibon” o‘z rahbarini shunday ataydi — “Daryo” izohi)ning ko‘rsatmasi va Oliy sudyaning buyrug‘i bilan amnistiyaga uchragan 2 460 nafar mahkum mamlakatdagi barcha qamoqxonalardan ozod qilinadi”, — deyiladi Oliy sud bayonotida.
Farmonga ko‘ra, yana 471 nafar mahkumning jazo muddati qisqartiriladi.
Afg‘onistondagi umumiy repressiv siyosat fonida “Tolibon” bayram munosabati bilan ko‘plab mahbuslarni afv etdi. Biroq Oliy sud bayonotida ozodlikka chiqqan mahkumlar toifalariga aniqlik kiritilmagan. Eslatib o‘tamiz, Afg‘oniston qamoqxonalarida oddiy jinoyatchilar ham, terrorchilik va toliblarga qarshi guruhlar jangarilari ham, ijtimoiy faollar, ayollar huquqlarini himoya qilish harakati a’zolari va jurnalistlar ham bor.
Avvalroq Turkmaniston prezidenti Serdar Berdimuhamedov Qadr kechasi sharafiga qamoqdagi 463 nafar mahkumni afv etgandi. Shuningdek, viloyat, tuman va shahar hokimliklari rahbarlariga afv etilgan shaxslarni ishga joylashtirish choralarini ko‘rish bo‘yicha topshiriqlar berilgani xabar qilingan.
20-aprel kuni Shavkat Mirziyoyev Ramazon hayitini nishonlash arafasida qilmishidan pushaymon bo‘lgan 541 nafar mahkumni afv etish to‘g‘risida farmon imzoladi.
Izoh (0)