Avtomobil ishlab chiqarish kamaygan, benzin esa ko‘paygan: O‘zbekiston sanoati birinchi chorakda qanday o‘zgardi?

2023-yilning yanvar—mart oylarida O‘zbekistonda 385,5 ming tonna avtomobil benzini ishlab chiqarilgan. Bu haqda Statistika agentligi xabar bermoqda. 

Avtomobil benzini ishlab chiqarish hajmi 2022-yilning mos davri bilan solishtirilganda 33,5 foizga oshgan.

2023-yilning birinchi choragida 385,5 ming tonna benzin ishlab chiqarilgan bo‘lsa, 2022-yilning ilk choragida bu ko‘rsatkich 289 ming tonnaga teng bo‘lgandi. 

Shuningdek, uch oyda ko‘mir ishlab chiqarish 1,1 mln tonnadan 989 ming tonnagacha kamaygan. 

Bu davrda neft ishlab chiqarish ko‘paygan — 183 ming tonnadan 195,5 ming tonnagacha. 

Gaz kondensatini ishlab chiqarish o‘tgan yilga nisbatan 31,5 ming tonnaga kamayib, 319,5 ming tonnani tashkil qilmoqda. 

Bundan tashqari o‘tgan yilning birinchi choragida 68,9 ming dona yengil avtomobil ishlab chiqarilgan bo‘lsa, 2023-yilda bu ko‘rsatkich 50 ming donagacha keskin pasaydi.