O‘zbekiston ko‘chmas mulk bozoridagi talab o‘zgarishlar tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar berdi.
Mart oyida ko‘chmas mulk bozorida faollikning biroz pasayishi qayd etildi. Bahorning birinchi oyida oldi-sotdi bitimlari soni 7,3 foizga kamayib, qariyb 21 mingtani tashkil etgan bo‘lsa, 2022-yilning mos davrida sotuvlar hajmi 2,9 foizga o‘sgan.
Umuman olganda, 2023 yilning 1-choragi natijalariga ko‘ra sotuvlar 2,7 foizga o‘sib, shartnomalar soni 61 mingdan oshdi. Shu bilan birga, 2021 yilning 1-choragi bo‘yicha o‘sish 5 foizni tashkil etdi.
Toshkentda ijaraga beriladigan uy-joy narxlarining o‘zgarishi
Mart oyida poytaxtning aksariyat tumanlarida ijaraga beriladigan uy-joy narxlarining pasayishi kuzatildi. Shunday qilib, Toshkent shahrida ijaraning o‘rtacha narxi 1 kvadrat metr uchun 9,2 dollarni tashkil etib, 7 foizga pasaydi.
Tumanlar kesimida ijaraning 1 kvadrat metr uchun eng yuqori narxlari poytaxtning Shayxontohur (11,9 dollar), Yakkasaroy (11,8 dollar) va Mirobod (12 dollar) tumanlarida qayd etildi.
Ijaraning nisbatan past narxlari poytaxtimizning Uchtepa (7,3 dollar), Sergeli (6,4 dollar) va Bektemir (5,8 dollar) tumanlarida qayd etildi.
Shu bilan birga, 2022-yilning mos davriga kelib, Toshkent shahrida ijaraning o‘rtacha narxi 17 foizga qimmatlashdi.
Yillik dinamikada eng baland ijara narxi Shayxontohur (23,8 foiz), Uchtepa (21,2 foiz) va Sergeli (20,9 foiz) tumanlarida qayd etildi.
Avvalroq O‘zbekiston hududlarida ipoteka krediti bo‘yicha vaziyat qandayligi haqida xabar berilgandi.
Izoh (0)