Автомобиль ишлаб чиқариш камайган, бензин эса кўпайган: Ўзбекистон саноати биринчи чоракда қандай ўзгарди?

2023 йилнинг январь—март ойларида Ўзбекистонда 385,5 минг тонна автомобиль бензини ишлаб чиқарилган. Бу ҳақда Статистика агентлиги хабар бермоқда. 

Автомобиль бензини ишлаб чиқариш ҳажми 2022 йилнинг мос даври билан солиштирилганда 33,5 фоизга ошган.

2023 йилнинг биринчи чорагида 385,5 минг тонна бензин ишлаб чиқарилган бўлса, 2022 йилнинг илк чорагида бу кўрсаткич 289 минг тоннага тенг бўлганди. 

Шунингдек, уч ойда кўмир ишлаб чиқариш 1,1 млн тоннадан 989 минг тоннагача камайган. 

Бу даврда нефть ишлаб чиқариш кўпайган — 183 минг тоннадан 195,5 минг тоннагача. 

Газ конденсатини ишлаб чиқариш ўтган йилга нисбатан 31,5 минг тоннага камайиб, 319,5 минг тоннани ташкил қилмоқда. 

Бундан ташқари ўтган йилнинг биринчи чорагида 68,9 минг дона енгил автомобиль ишлаб чиқарилган бўлса, 2023 йилда бу кўрсаткич 50 минг донагача кескин пасайди.