O‘zbekiston poytaxti supermarketlarida mavsumning yana bir yangiligi — ertapishar, xalq orasida “May olmalari” deb ataladigan olmalar paydo bo‘ldi. Bu haqda EastFruit xabar bermoqda.
Ekspertlarning ta’kidlashicha, nomiga qaramay, “May olmalari” chakana savdoda aprel oyining ikkinchi yarmida paydo bo‘lgan.
Bu mavsumda ertapishar olmalar O‘zbekiston poytaxtidagi supermarketlar peshtaxtasida o‘tgan yilga nisbatan bir necha kun erta paydo bo‘lgan. Ammo o‘rtacha narxi 2022-yil aprel oyidagidan 7 barobar arzon.
2023-yilning 17-aprelida “Korzinka” supermarketlar tarmog‘i chakana narxi 17 990 so‘m/kg bo‘lgan “May olmalari” savdosi boshlanganini e’lon qildi. Bu yangilik hozircha ushbu tarmoqning O‘zbekiston poytaxti Toshkent shahrida joylashgan to‘rtta do‘konida mavjud.
Taqqoslash uchun, 2023-yil 19-aprel holatiga ko‘ra, oddiy va ommabop navlar narxi poytaxt supermarketlarida 11 500 so‘mdan 18 000 so‘m/kg (1,00 dan 1,57 dollargacha) oralig‘ida sotilmoqda.
2022-yilning bahorida “May olmalari” Toshkent supermarketlarida 20–23-aprel kunlari 1 kilogrammi 117 000 so‘mdan 129 990 so‘mgacha narxda paydo bo‘lgan edi.
O‘zbekistonda odatda yangi hosilning erta olmasini ommaviy yig‘ish mavsumi may oyining o‘rtalaridan boshlanadi. Aynan shu davrda O‘zbekiston ilk bor ertapishar olma eksportini boshlaydi. Biroq eksport uchun olma yetkazib berishning asosiy hajmi yoz oylariga to‘g‘ri keladi.
Izoh (0)