Putin Qozog‘istonga gaz uchun rekord darajada chegirma taklif qildi

Rossiya prezidenti Vladimir Putin Qozog‘istonga gaz uchun rekord darajadagi chegirma taklif qildi. Bu haqda The Moscow Times xabar berdi.

Nashrining yozishicha, chegirma mamlakat prezidenti Qosim Jo‘mart-To‘qayevni Xitoyga yangi quvur qurish loyihasida ishtirok etishga ko‘ndira olishi uchun taklif qilingan.

Xabarda ta’kidlanganidek, va’da qilingan chegirma “Gazprom”ning boshqa barcha mijozlariga nisbatan eng balandi bo‘ladi.

Qozog‘iston energetika vaziri Almasadam Satkaliyevning so‘zlariga ko‘ra, Rossiya mamlakatning shimoliy va sharqiy qismini ta’minlash uchun yetkazib berishga tayyor bo‘lgan gaz Belarusnikidan ancha arzonga tushadi. Yevropaniki bilan solishtirganda esa narxlar o‘rtasidagi farq juda yuqori bo‘ladi.

Belarus Rossiya gazini ming kub metriga 128,5 dollardan to‘laydi va bu dunyodagi eng past eksport narxidir. 

BCS Global Markets ma’lumotlariga ko‘ra, Xitoyga “Sibir qudrati” quvuri orqali yetkazib berish narxi rasman oshkor etilmagan, lekin har ming kub metr uchun 290 dollarni tashkil qilishi kutilmoqda.

Avvalroq Putin Yevropa bilan gaz urushida yutqazgani haqida xabar berilgandi.