Xitoyda kompaniya xodimi maosh to‘lanadigan 365 kunlik ta’til yutib oldi

Xitoyda kompaniya xodimi 365 kunlik haq to‘lanadigan ta’til yutug‘ini qo‘lga kiritdi, deb yozmoqda Asia One.

OAV xabarlariga ko‘ra, sovrin kompaniya tomonidan har yili o‘tkaziladigan kechki ovqat bazmida o‘ynalgan. Firmaning yuqori lavozimda ishlovchi xodimi o‘yin g‘olibiga aylangan. Avvaliga u omadiga ishonmagan va o‘yin tashkilotchisidan bir necha marta natijani tekshirib ko‘rishni so‘ragan. Kompaniya rahbariyati xodim bilan ta’tilga chiqishi yoki buning o‘rniga naqd pul olishni xohlashi masalasini muhokama qiladi.

G‘olib haqidagi xabarlar ijtimoiy tarmoq foydalanuvchilarining havasini uyg‘otdi. Ko‘pchilik bu kompaniyada bo‘sh ish o‘rinlari bor-yo‘qligiga qiziqmoqda. Biroq ayrimlar xodim bir yilga ta’tilga chiqsa, uning o‘rniga boshqa odam olinishidan xavotirda. Erkakning o‘zi hali rejalarini oshkor qilgani yo‘q.

Avval AQSHda Powerball lotereya chiptasini sotib olgan omadli kishiga jekpot chiqqan va u 2,04 milliard dollar yutib olgan edi. Bu tarixdagi eng yirik lotereya yutug‘i. Ammo g‘olib milliarderlar safiga kira olmaydi. Chunki AQSHda lotereya yutug‘i — soliqqa tortiladigan daromad. Soliqlardan keyin pulning qanchasi g‘olibga tegishi hisoblab chiqilgan.