Belarus prezidenti Aleksandr Lukashenko Minskda Rossiya tomonidan tayinlangan “Donetsk xalq respublikasi muvaqqat rahbari” Denis Pushilinni qabul qilganidan so‘ng, Ukraina o‘zining Belarusdagi elchisi Igor Kizimni maslahatlashuvlar uchun Kiyevga chaqirib olayotganini e’lon qildi.
Ukraina tashqi ishlar vazirligi bayonotida Lukashenko va Pushilin o‘rtasidagi uchrashuv “Donetskdagi Rossiyaning ishg‘olchi ma’muriyati vakilini qonuniylashtirishga urinish” deb nomlandi.
“Og‘ir jinoyatlar sodir etgani uchun Ukraina tergovidan yashirinib yurgan, Ukrainaning va xalqaro sanksiyalar ostida bo‘lgan Rossiya ishg‘olchi ma’muriyati vakili bilan uchrashuvni Belarus respublikasining agressor Rossiyani qo‘llab-quvvatlashga qaratilgan navbatdagi ochiq-oydin dushmanona harakati, deb hisoblaymiz”, — ta’kidladi Ukraina TIV.
Shu bilan birga, Kiyev Minskni “bunday buzg‘unchi qadamlardan tiyilishga va Rossiyaning Ukrainaga qarshi agressiv urushini qo‘llab-quvvatlashni to‘xtatishga” chaqirdi.
Aleksandr Lukashenko Denis Pushilinni qabul qildi
“DXR rahbari vazifasini bajaruvchi” Denis Pushilin 18-aprel kuni Minskda Belarus prezidenti Aleksandr Lukashenko bilan uchrashdi. Lukashenko matbuot xizmatining xabar berishicha, uchrashuvda u Pushilindan Belarus Donetskga qanday yordam bera olishini so‘ragan.
“Nima bo‘lmasin u yerda (Donetsk viloyatining Rossiya tomonidan bosib olingan qismida — “Daryo” izohi) odamlar yashaydi. Bu 100 foiz. Odamlarning esa qornini to‘ydirish kerak. Shuning uchun biz ta’minotga tayyormiz. Bizga begona bo‘lmagan odamlarning azob-uqubatlarini tugatish uchun tegishli yordam va qo‘llab-quvvatlov beriladi”, — deya Belarus rahbarining so‘zlarini keltirdi matbuot xizmati.
Ukraina Qurolli kuchlari Bosh shtabi bir necha bor kunlik hisobotlarida RF Qurolli kuchlarining ayrim bo‘linmalari Belarusda joylashtirilganini ta’kidlagan. Shu bilan birga, harbiy ekspertlar Rossiya kuchlarining Ukrainaga Belarus hududidan hujum uyushtirish ehtimolini muhokama qilgan.
Izoh (0)