Kim Chen In Pxenyan harbiy razvedka sun’iy yo‘ldoshini uchirishini e’lon qildi

Shimoliy Koreya yetakchisi Kim Chen In Pxenyan harbiy razvedka sun’iy yo‘ldoshini uchirayotganini e’lon qildi. Bu haqda Janubiy Koreyaning Yonhap agentligi xabar bermoqda.

Kim Chen In apparatni uchirishga tayyorgarlik ko‘rish bo‘yicha komissiya tashkil qildi, deyiladi Shimoliy Koreyaning markaziy telegraf agentligi xabarida. Kim Chen In AQSH va Janubiy Koreyadan kelayotgan “tahdidlar” fonida kosmik razvedka imkoniyatlariga ega bo‘lish muhim ekanini ta’kidlagan.

14-aprel kuni Shimoliy Koreya birinchi marta “Xvason-18” qit’alararo ballistik raketasini uchirgan edi. Kim Chen In bu sinov “mamlakatning dushman hujumiga yadroviy zarba berishga tayyorligini oshirishi” va “strategik tiyib turuvchi kuchlar tarkibini tubdan qayta qurish” imkonini berishini ta’kidlagan.

Shimoliy Koreya raketa uchirganidan keyin Yaponiyada evakuatsiya e’lon qilingan. Mamlakat xavfsizlik tizimi KXDR raketasi Xokkaydo oroliga yoki uning yaqiniga tushishi mumkinligini bashorat qilgan. Tez orada signal bekor qilindi — Tokiodagilar prognoz xato chiqqanini va Shimoliy Koreya raketasi dengizga qulaganini aytishdi.

Shimoliy Koreya rasmiylari ham uchirish “qo‘shni davlatlar xavfsizligiga salbiy ta’sir ko‘rsatmagan”ini ma’lum qildi.

“Xvason-18” uchirilganidan keyin Janubiy Koreya, AQSH va Yaponiya harbiylari Yapon dengizida raketaga qarshi mudofaa mashg‘ulotlarini boshladi. Janubiy Koreya Harbiy-dengiz kuchlari vakili tadbirni “Shimoliy Koreyaning yadro va raketa tahdidlariga qarshi Janubiy Koreya, AQSH va Yaponiya o‘rtasida xavfsizlik sohasida hamkorlikni kuchaytirish imkoniyati” deb atadi.