Tailandda Pattavikorm Bunrin ismli erkak ChatGPT tuzib bergan raqamlar to‘plami orqali lotereyada pul mukofotini qo‘lga kiritdi. Bu haqda mahalliy Thaiger nashri xabar berdi.
Ma’lum qilinishicha, pul mukofoti taxminan ikki ming batni (59 dollar) tashkil etadi. Neyron tarmoq erkakka to‘rtta variantni taklif qilgan: 57, 27, 29 va 99. O‘sha kuni ikki xonali yutuq raqami 99 ni tashkil qilgan. ChatGPT lotereya uchun darhol javoblarni taqdim etmagan. Bunrin lotereyada yutish uchun raqamlar haqida so‘raganida ChatGPT “bu oldindan aytib bo‘lmaydigan holat va omadga bog‘liq” deb javob bergan.
ChatGPT hazillashib, tailandlik erkakka “lotereyaga o‘ynashni to‘xtatib, sport bilan shug‘ullanishni” tavsiya qilgan. Shundan so‘ng erkak so‘nggi 10 yil ichida yutuqqa olib kelgan raqamlarning tarixiy statistikasi bilan birga faraziy vaziyatlar bo‘yicha ChatGPTga so‘rov kiritgan.
Avvalroq ChatGPT itning hayotini saqlab qolgani ma’lum bo‘lgandi. Jumladan, chatbot veterinariya shifokorlari aniqlay olmagan qon kasalligini aniq tashxislash orqali jonivorning hayotini saqlab qolgan.
Ma’lumot o‘rnida, Italiya ChatGPT’dan foydalanishni taqiqlagan dunyodagi birinchi davlat hisoblanadi. Chatbot ishlab chiqaruvchisi Amerikaning OpenAI kompaniyasi shaxsiy ma’lumotlarga oid qonunchilikni buzgani ma’lum qilingan. Jumladan, neyron tarmoq +13 yosh chegarasiga qaramay, foydalanuvchilarning yoshini tekshirmasligi ta’kidlanadi.
ChatGPT (Chat generative pre-trained transformer) — OpenAI tomonidan yaratilgan sun’iy intellekt chatboti bo‘lib, turli savollarga javob berishi, dasturchilar uchun kod yozishga yordam berishi, talabalar uchun esa kurs ishlarini yozib berishi mumkin. Bot hattoki she’r va insholar ham yoza oladi. OpenAI’ning asosiy vazifasi inson miyasi bajara oladigan hamma narsani qiluvchi sun’iy intellektni yaratishdan iborat.
Izoh (0)