Kaliforniyaning Altadena shahridagi Joe’s Service markazidan Powerball lotereya chiptasini sotib olgan omadli kishiga jekpot chiqdi va u 2,04 milliard dollar yutib oldi. Bu tarixdagi eng yirik lotereya yutug‘i. Ammo g‘olib milliarderlar safiga kira olmaydi. Chunki AQSHda lotereya yutug‘i — soliqqa tortiladigan daromad. Ayni damda ko‘pchilik yutuq egasi ikki milliarddan qanchasini uyga olib ketishi bilan qiziqmoqda.
Powerball g‘olibi pulni qanday tartibda olishini o‘zi tanlashi mumkin: bir martalik to‘lov yoki bo‘lib-bo‘lib olish. Agar g‘olib bir martalik to‘lovni tanlasa, unga beriladigan mablag‘ mukofotning faqat yarmini tashkil qiladi, ya’ni u 997,6 million dollar oladi. 2,04 milliard dollarni to‘liq olishi uchun g‘olib 30 yillik bo‘lib to‘lash rejasini tanlashi kerak. Bu yiliga taxminan 68 million dollarga tushadi. Bularning barchasi soliqlarni hisobga olmaganda.
Powerball g‘oliblarining aksariyati bir martalik to‘lovni tanlaydi. 2,04 milliard dollarlik yutuqda pul haqiqatan ham 997,6 million dollarni tashkil etadi, ammo g‘olib buncha pulga chek olmaydi. Powerball yutug‘ining 24 foizi (239 424 000 dollar) soliq sifatida ushlab qolish uchun IRS (AQSH Ichki daromad xizmati)ga o‘tkaziladi. Bunda g‘olibga 758 176 000 dollar qoladi. Biroq eng yuqori soliq stavkasi 37 foizni tashkil qiladi — Powerball’ni yutib olgan odamning daromadi esa ushbu toifaga kiradi. Shunday qilib, 2023-yil 15-aprelda yutuq egasi ushlab qolingan 24 foiz va 37 foiz soliq stavkasi o‘rtasidagi farqni yopish uchun IRS’ga 129 688 000 dollar miqdorida chek yozishi kerak. Natijada, federal daromad solig‘idan keyin unda 628 488 000 dollar qoladi.
Keyinchalik g‘olibning davlat soliqlari lotereyadagi yutug‘iga qarab ortishi mumkin. AQSHning aksariyat shtatlarida o‘z daromad solig‘i bor, Kaliforniyada bu 13,3 foizni tashkil qiladi. Ammo lotereya egasi ushbu shtatdan bo‘lsa, unga yana bir omad kulgan, chunki Kaliforniya soliq qonunchiligi bo‘yicha Powerball yutuqlari shtatda soliqdan ozod qilingan. Agar Kaliforniya yutuqni soliqqa tortganida, bunga yana 132,7 million dollar ketgan bo‘lardi. Agar lotereya g‘olibi Powerball yutuqlarini soliqqa tortadigan boshqa shtatda istiqomat qilsa, uning soliq to‘lovi o‘sishda davom etishi mumkin.
Izoh (0)