Qashqadaryoda ota 14 yoshli qizini ayovsiz kaltakladi (video)

Qashqadaryo viloyatining Koson tumanida yashovchi 14 yoshli qiz otasi tomonidan ayovsiz kaltaklandi. Bu haqda “Daryo” manbasi xabar berdi hamda voqea tasvirlangan videoni tahririyatga taqdim qildi.

“Daryo”ning bu haqdagi dastlabki so‘roviga javob bergan Koson tumani hokimi o‘rinbosari, oila va xotin-qizlar bo‘limi boshlig‘i Nodira Qodirova O‘zbekistonda xotin-qizlar huquqlarini himoya qilish, ularga nisbatan bo‘layotgan zo‘ravonliklarni to‘xtatish maqsadida yangi qonun qabul qilingan paytda sodir bo‘lgan ayni voqea huquqni muhofaza qiluvchi organlar tomonidan nazoratga olinganini maʼlum qildi.

Viloyat IIB axborot xizmati esa voqea qachon sodir bo‘lganiga aniqlik kiritdi.

“Joriy yilning 16-aprel kuni taxminan soat 11:30 larda Koson tumani ‘Qorabayir’ mahallasida yashovchi 2009-yilda tug‘ilgan X.G. onasi 1982-yilda tug‘ilgan M.M. hamda otasi 1978-yilda tug‘ilgan T.R. tomonidan kaltaklangan. Mazkur holat voyaga yetmagan qizning amakisi tomonidan videotasvirga olinib, Ichki ishlar organlariga xabar berilgan. Hozirda voqea ishtirokchilarining barchasi aniqlanib, tergovga qadar tekshiruv ishlari olib borilmoqda. Voyaga yetmagan qizning otasi ruhiy kasalliklar dispanseriga tekshirish uchun yuborilgan. Jabrlanuvchi X.G.ga nisbatan yetkazilgan tan jarohatlarini aniqlash uchun sud-tibbiy ekspertizasi tayinlangan”, — deyiladi rasmiylar maʼlumotida.

Koson tumani hokimligining maʼlumot berishicha, o‘sha kuni voqeadan mahalla xodimlari, tuman hokimligi, oila va xotin-qizlar bo‘limi xabar topib, tuman ichki ishlar organlariga otaning harakati bo‘yicha xabar berilgan.

“O‘sha kuniyoq ekspertiza tayinlanib, hozirgi kunda xulosalari ko‘rib chiqilmoqda”, — deydi hokimlik axborot xizmati rahbari Dilshod Nabiyev.

Hokimlikning aniqlashtirishicha, kaltaklangan qiz otaning boshqa turmushidan tug‘ilgan farzandi bo‘lib, videodagi ona uning o‘gay onasi bo‘lgan.

“Oila va xotin-qizlar bo‘limi tomonidan tuman hokimligi bolalarni himoya qilish sho‘basi maʼsullari jalb qilinib, bolaning huquqini har tomonlama qo‘llab-quvvatlash borasida tegishli ko‘rsatmalar berilgan. Shuningdek, ota-ona bilan ham alohida suhbat o‘tkazilib, tushuntirish ishlari olib borildi. Hozirgi kunda qiz mahalla qaramog‘iga olingan hamda uning xavfsizligi taʼminlangan. Bugungi kunda bolaning va otaning roziligi asosida uning vasiylikka berilish masalasi ko‘rib chiqilmoqda”, — deyiladi hokimlik axborotida.