Toshkent 2023-yilning 30-aprelidan 14-mayigacha boks bo‘yicha kattalar o‘rtasida Jahon chempionatiga mezbonlik qiladi.
Xalqaro boks assotsiatsiyasi (IBA) mazkur musobaqaning sovrin jamg‘armasini e’lon qildi. Unga ko‘ra, turnirning umumiy sovrin jamg‘armasi 5,2 million dollarni tashkil etadi. Qayd etish kerak, bu rekord natija hisoblanadi.
Sovrindorlar quyidagi pul mukofotlari bilan taqdirlanadi:
- Oltin — 200 ming dollar
- Kumush — 100 ming dollar
- Bronza — 50 ming dollar
Jahon chempionatida 13 ta vazn toifasi bo‘yicha janglar o‘tkaziladi.
Avvalroq AQSH, Shvetsiya, Irlandiya, Chexiya va Kanada boks federatsiyalari Hindiston (ayollar o‘rtasida) va O‘zbekistonda (erkaklar o‘rtasida) bo‘lib o‘tadigan boks bo‘yicha Jahon сhempionatiga boykot e’lon qilgani xabar qilingandi. Keyinchalik Ukraina va Norvegiya ham ularga qo‘shilgan. Bunga sabab sifatida federatsiyalar Rossiya va Belarus bokschilariga musobaqalarda o‘z bayrog‘i ostida harakat qilishga ruxsat berilganini qayd etgandi.
Eslatib o‘tamiz, rossiyalik Umar Kremlyov 2020-yilning dekabridan buyon IBA’ni boshqarib kelmoqda. Bungacha u Rossiya boks federatsiyasi bosh kotibi lavozimida ishlagan. U lavozimga tayinlangan paytda tashkilotning qarzlari 20 million dollarni tashkil qilgan. 2021-yilning may oyida Kreml barcha qarzlarning to‘liq qaytarilishini e’lon qilgan. 2022-yilda Kremlyov IBA prezidentligiga qayta saylandi.
Izoh (0)