MMA olamidagi eng nufuzli promoushen UFC’da 2023-yilda 8 ta titul jangi o‘tkazildi. Qizig‘i, ularning oltitasida yangi chempion aniqlandi, faqat ikki jangchi kamarni muvaffaqiyatli himoya qila oldi. “Daryo” 2023-yilda chempionlikka erishgan va titulni himoya qilgan UFC jangchilarini eslab o‘tadi.
Brendon Moreno
Mutlaq yengil vazn toifasi vakili yilning dastlabki raqamli musobaqasida Deyvison Figeyredoga qarshi to‘rtinchi jangini o‘tkazdi. Jang uchinchi raunddan keyin to‘xtatildi, shifokorlar braziliyalikka jangni davom ettirishga ruxsat bermadi.
Moreno va Figeyredo o‘rtasidagi dastlabki jangda durang qayd etilgan (titul Deyvisondan qolgan). Keyingi jangda Brendon ochkolar evaziga g‘alaba qozongan va chempionga aylangan. Trilogiyada Figeyredoning qo‘li baland kelgan. Moreno azaliy raqobatdagi to‘rtinchi jangda yutib chiqdi va titulni qaytarib oldi.
Jamal Hill
Irji Proxazkaning jarohatidan keyin yarim og‘ir vazn toifasining kamari vakant qoldi. Avvaliga ushbu kamar uchun Magomed Ankalayev va Yan Blahovich dekabr oyida kurash olib bordi. Biroq ularning jangida g‘olib aniqlanmadi. Shu bois UFC navbatdagi da’vogarlar sifatida Jamal Hill va Glover Teysheyrani tanladi.
Rioda o‘tgan MMA oqshomida Hill mezbon sportchiga imkon qoldirmadi va bir ovozdan g‘olib deb topildi. Teysheyra mazkur jangdan keyin faoliyatini yakunlashini ma’lum qildi.
Islom Maxachev
Yengil vazn toifasi chempioni Avstraliyada yarim yengil divizioni chempioni va o‘sha vaqtda P4P reytingi yetakchisi Aleksandr Volkanovskiga qarshi oktagonga ko‘tarildi.
Besh raund davom etgan jangning uchta raundni Islom o‘z foydasiga hal qildi va kamarni muvaffaqiyatli himoya qildi.
Yair Rodriges
Yarim yengil vazn toifasi chempioni boshqa divizionga “sayohat qilgani” ketgani bois ushbu divizion vaqtinchalik chempionligi uchun jang o‘tkazildi. Unda Yair Rodriges va Josh Emmett o‘zaro to‘qnash keldi.
Avstraliyada o‘tgan jangning ikkinchi raundida Rodriges raqibini sabmishen evaziga taslim etdi.
Aleksa Grasso
UFC 285 musobaqasida yil apseti kuzatildi. Promoushenning eng dominant chempioni Valentina Shevchenko oson o‘tishi kutilgan jangda meksikalik raqibiga imkoniyatni boy berdi.
Jangni to‘liq o‘z nazoratida ushlab turgan qirg‘izistonlik sportchi to‘rtinchi raundda zarba berish chog‘ida qo‘pol xatoga yo‘l qo‘ydi. Aleksa Grasso esa bundan unumli foydalanib, sabmishen bilan mag‘lub etdi.
Jon Jons
Uch yillik tanaffusdan keyin tirik afsona UFC’ga qaytdi va darhol yangi o‘zi uchun yangi hisoblangan divizionda chempionlikni qo‘lga kiritdi. Og‘ir vazn toifasida Frensis Ngannudan keyin vakant qolgan kamar uchun Jons Siril Ganga qarshi jang qildi.
Jons bellashuvni uzoq cho‘zib o‘tirmadi va birinchi raunddayoq raqibini sabmishen bilan taslim etdi. Shu tariqa yarim og‘ir divizionda uzoq vaqt gegemonlik qilgan Jon eng og‘ir vazn toifasida ham chempionga aylandi. UFC ushbu kambekdan keyin Jonsni P4P reytingida birinchi o‘ringa qaytardi.
Leon Edvards
Yilning yana bir sensatsion natijalaridan biri Leon Edvards va Kamaru Usmon o‘rtasidagi trilogiyada qayd etildi. Garchi 2022-yildagi g‘alabaga qaramasdan Edvards ushbu jangda autsayder sifatida qaralayotgandi.
Biroq Edvards bellashuvga Kamarudan ko‘ra yaxshiroq tayyorlangani ma’lum bo‘ldi. Yarim yil avvalgidan farqli o‘laroq Edvards UFC 286 oqshomidagi jangda ancha ishonchli harakat qildi va ochkolar evaziga g‘alaba qozondi.
Israel Adesanya
Kamarudan farqli ravishda Adesanya Aleks Pereyraga qarshi o‘tgan avvalgi jang tasodif ekanini isbotlay oldi. Noyabr oyidagi g‘alabadan keyin Pereyra darhol revanshni qabul qilgandi. Oradan besh oy vaqt o‘tib jangchilar yana oktagonga ko‘tarildi.
Jangni braziliyalik yakkakurashchi yomon boshlamadi va tengma-teng kurash taklif qila olishini bildirib qo‘ydi. Biroq ikkinchi raundda Israel qarshi hujumda mohirona harakat qilib, raqibini chuqur nokaut holatiga tushirib qo‘ydi va kamarini qaytarib oldi.
Yaqin oradagi titul janglari haqida
Keyingi uchta musobaqada MMA muxlislarini to‘rtta titul jangi kutib turibdi. May oyida o‘tadigan UFC 288 da o‘ta yengil divizion chempioni Aljameyn Sterling sobiq chempion Genri Sexudoga qarshi jang qiladi. Iyundagi UFC 289 turnirida Amanda Nunyes yana Juliana Penyaga qarshilik qiladi.
Iyul oyidagi UFC 290 da ikkita vazn toifasida chempionlik jangi o‘tkaziladi. Yarim yengil toifaning chempioni Aleksandr Volkanovski vaqtinchalik chempion Yair Rodriges bilan, mutlaq yengil vazn divizioni chempioni Brendon Moreno esa Alexandre Pantoya bilan to‘qnash keladi.
Izoh (0)