Navoiyda bir nechta noqonuniy faoliyat olib borayotgan ohak pishirish sexlari faoliyati to‘xtatildi, deb xabar bermoqda Tabiat resurslari vazirligi matbuot xizmati.
Vazirlikning Navoiy viloyati boshqarmasiga Navoiy shahrining “Bunyodkor”, “Binokor” MFY, “Ishchilar” qo‘rg‘oni, Sadriddin Ayniy ko‘chasi hamda vokzal hududi aholisidan murojaat kelib tushgan.
Murojaatlarni o‘rganish maqsadida viloyat boshqarmasi tomonidan Karmana tumani tabiat resurlari inspeksiyasi, tuman davlat soliq inspeksiyasi, tuman favqulodda vaziyatlar boshqarmasi, tuman qurilish bo‘limi, tuman sanitariya epidemologik osoyishtalik va jamoat salomatligi bo‘limi, Kadastr agentligi tuman bo‘limi, “Yangi ariq” MFY raisi hamda mahalla profilaktika inspektori tomonidan ishchi guruh tuzilib, Karmana tumanidagi “Yangi ariq” MFY hududida faoliyat yuritayotgan ohak pishirish sexlarining faoliyati o‘rganilgan.
O‘rganish davomida Karmana tumani “Yangi ariq” MFY hududidagi ohak pishirish sexlarida monitoring kuzatuvi o‘tkazilib, tahlil qilingan. Tahlil natijalariga ko‘ra, atmosfera havosiga vodorod sulfidi, formaldegid, uglerod oksidi, oltingugurt, qo‘sh oksidlari kabi zaharli moddalar meʼyoridan ortiq chiqarilayotgani aniqlangan.
Shuningdek, hududlardagi ohak ishlab chiqarish sexlari xatlovdan o‘tkazilganda Karmana va Qiziltepa tumanida yashovchi fuqarolarga qarashli ohak ishlab chiqarish sexlari ham noqonuniy tarzda faoliyat yuritib kelayotgani ma’lum bo‘lgan.
Holat yuzasidan Maʼmuriy javobgarlik to‘g‘risidagi kodeksning tegishli moddalariga asosan maʼmuriy ish qo‘zg‘atilgan. Shuningdek, sex faoliyati ko‘rsatib o‘tilgan holatlar bartaraf etilguniga qadar vaqtincha to‘xtatilgan.
Bundan tashqari, Karmana tumani hududida faoliyat yuritayotgan ohak ishlab chiqarish sexlari — “Shaxboz Navoiy”, “Gold Cheken Farm”, “Hamid Akrom Kelajagi Servis”, “Imron Karmana Navoiy” masʼuliyati cheklangan jamiyatlariga hamda fuqarolar D.B, B.A, T.F, K.T.ga tegishli tartibda chang-gaz tozalash uskunalarini o‘rnatish to‘g‘risida ogohlantirish xatlari berilgan.
Izoh (0)